當年今日

馬莎百貨超市 天天飛機運到鬆軟麵包

蘋果日報 2002/01/06 00:00


想食英式食品,未必一定要到英國,喺香港一樣可以買到,就係去馬莎的超級市場,呢度的英國食品不但種類多達百幾種,全部都係由英國直接入口,其他地方買唔到,好似各式各樣的麫包、餅乾、罐頭、醬料等。

記者:葉少萍 攝影:周旭文
英式印度麫包
呢三款麫包,以巴基斯坦及印度風味製成,以蒜茸香料味的印度式麫包最香,原味印度式麫包入口麥味夠,巴基斯坦式麫包又軟又腍之外,重有少少香草味夠特別。呢啲麵包重係日日飛機運到,保證夠晒新鮮。
酥皮多士夠鬆脆
酥皮多士最多人買,入口鬆脆,用多士爐加熱約1-3分鐘可食用。日日飛機運到,保證夠晒新鮮,再配呢兩款又酸又甜的香檸果醬及紅西柚果皮醬同食,簡直是一流享受。果醬開封後,必須存於雪櫃,可放約4星期。
低脂美味醬汁
低脂蛋黃醬(圖右),脂肪含量低達50%,加落沙律撈勻食,不但增加沙律味道,又唔會太肥,重可以用來塗麫包,或用作伴煮炸食品同食一樣得,由兩種味混合而成的香蜜芥子醬汁(圖左),不但脂肪含量低達3%,蜜糖味夠香甜,芥子味夠清甜,亦係塗麫包食最一流。兩款醬汁開封後,都必須放入雪櫃中儲存,可保存約4星期。
貴價高質罐頭菜
鍾意食香辣食品人士,呢幾款辣味罐頭菜,就係最佳之選,全部喺英國製造後空運到港,有少辣的泰式咖喱雞塊同椒香雞粒,中辣有中度咖喱雞,大辣就有濃味咖喱雞及特濃咖喱羊肉,款款都辣味十足兼材料豐富,只要將咖喱倒出煮3-4分鐘即可。價錢雖不平,仍然大受歡迎,只因品質佳。
餐前小食 醋浸洋葱
中國人有醃蒜頭作伴碟,或餐前小食,英國人同樣有,就係呢款用醋浸製的洋葱,都係用以作伴碟或餐前小食,未入口已聞到陣陣洋葱味,入口酸酸甜甜,作開胃小食就最適合。