渣打集團（2888）高層管理團隊又有人事調動，不過今次唔係裁員，而係有人退休有人擴大職權，較受關注嘅，應該係本地市場熟悉嘅洪丕正（Ben，圖），除咗繼續擔任大中華及北亞區行政總裁外，由本月底（11月30日）起，會接替退休嘅Karen Fawcett，兼任埋集團零售銀行業務行政總裁，兩頂CEO帽一齊戴。

首位華人零售銀行業務CEO

華華聽聞，年僅53歲嘅阿Ben，仲係渣打有史以來，首位坐到呢個集團業務第一把手高位嘅華人㖭！
洪丕正1992年加入渣打，喺集團服務已達25年，佢亦締造咗唔少CEO紀錄，包括2008年初，年僅43歲便獲委任為香港區行政總裁，係渣打香港有史以來最年輕嘅CEO。
本身已經係集團最高管理團隊成員嘅Ben哥，今次公佈後，算唔算升職再上層樓，就唔太清楚，但責任就肯定大咗，雖然能者多勞，都要保重身體嘞。
渣打亦公佈，商業及私人銀行及財富管理業務行政總裁Anna Marrs，自去年底起兼任東盟及南亞地區行政總裁，佢將會由現時至今年第4季期間，分兩階段將地區行政總裁職能，交棒畀新加坡行政總裁徐仲薇，Marrs日後會專注商業及私人銀行和財富管理業務發展。

李華華
mailto:[email protected]