由英超聯會同各支球隊代表，早前就舉行高峰會，大家傾吓有咩改革；正所謂講錢就失感情，Big6代表包括曼聯、曼城、車路士、阿仙奴、利物浦同熱刺，齊齊要求改革直播收入制度，唔想中下游球隊投資少少一樣分到鉅額收益，不過其餘14支球隊就梗係反對啦。

英超宜家直播收入就行共產制，將國內及海外收入加埋，再平分俾20支球隊，以今季為例，冠軍車路士同榜尾嘅新特蘭，一樣分到8440萬鎊（約8.4億港元）；不過因應排名獎金、全國直播場次多寡，最終收益就有啲唔到，好似車路士最終就有1.53億鎊收入，新特蘭就只收到9900萬鎊。雖然制度就好似公平，但Big6就唔係咁諗，因為佢哋覺得自己投資多過中下游球隊好多，海外市場收益勁，都係佢哋功勞，所以就希望改變現行制度，擴大佢哋嘅收入比例。

不過弱隊就當然唔係咁諗啦，所以會內就群起反對，而且係大多數，最終都冇結果；據報英超聯會就想作出讓步，計劃下季將排名獎金嘅距離拉得更闊，等好成績球隊，分錢比例多過今季，鼓勵球隊爭取好排名。