唔理大潘定小潘，總之這晚（28日）谷草就無「潘」不歡！頭兩場分別由潘頓「進綵」及潘明輝「盈豐駿駒」勝出後。第三場四班一哩又係阿潘贏馬。呢次輪番潘頓，佢騎葉楚航馬房「風采」後上一攻而破，個人率先起孖領先騎師王，今場單Win及組合獨贏A3分別派156及42.5元。

大潘今晚起孖後，季內頭馬突破100場，現有101Win，雖則冇可能追到暫以166場領先的莫雷拉，但就做硬今屆亞軍騎師。

講番「風采」呢匹七歲馬，今晚係本身季內第17次出賽，早段守第九位留前鬥後，直路衝刺凌厲，贏0.75馬位，季內已拎到三冠三季兩殿。

「風采」馬主鄭龍敦表示，愛駒今季贏第一場時，葉楚航對他說會幫此馬攞3Win，結果承諾兌現。鄭龍敦又謂有匹自購馬A376放在方嘉柏馬房，補替已退役的「索咖啡」，原本想改名為「索爆」，但馬會不批准，因此將改為「索勝」。葉楚航表示「風采」將跑7月12日三班谷草1800米，便會光榮退役，而鄭龍敦稍後將會給葉楚航一匹自購新馬接棒。

第三場係全洋將天下，頭三名「風采」（潘頓）、「鑽石達人」（祈普敦）及「常妙星」（李寶利）分別15、19及35倍，第四名由大熱門「塑料喜」於史卓豐胯下拎到，四重彩派11萬幾。

另外，後備補出馬「栗馳駒」在閘前因健康理由退出，孖寶及特別彩池轉投大熱門「塑料喜」當輸。