反送中運動由6月爆發至今警暴肆虐全港，各區居民都偶爾會被催淚煙狂攻，甚至被警員無故封鎖回家必經之路，以致有家歸不得。不少地區居民可能一個月總會遇上一、兩次，但居於主戰場灣仔區的街坊卻幾乎每周數次。居住該區的年輕情侶阿文及Winnie（化名）指，高峰期8月至9月期間幾乎每逢周末，其住所外四面八方均佈滿防暴警，如同十月圍城般狂放催淚彈，兩人直言「真係忍佢哋好耐」。自7月起，每當警方在其住所外戒備，兩人都會到樓下向警員「問候」幾句，「有人搞你屋企，你點可能無動於衷！調返轉，有人去搞警察宿舍，啲警察都24小時棟晒喺門口啦，依家你搞我屋企呀，我都係鬧返你兩句，唔係好過份咋！」

記者：林穎嵐　　攝影：徐雲庭

阿文和Winnie居於灣仔天樂里多年，兩人形容，由7月起區內已充斥警暴陰霾，街坊連買餸都隨時被喝罵甚至被捕。「做咩都提心吊膽，依家見到警察覺得好驚，你唔會覺得佢哋保護緊社會，每次佢哋喺度就覺得會有衝突。」他們形容，灣仔街坊中有許多藍絲，但當警暴影響他們生活時，許多街坊都逐漸對警察不滿，坦承自9月起，區內明顯有越來越多街坊到樓下指罵警員，表達不滿。

Winnie指，由於灣仔鄰近港島區遊行地點，警方幾乎每次都會在遊行結束後在灣仔天樂里一帶設路障及封路。今年8月18日，民陣於維園舉行大型流水式集會，約170萬市民到場參與，及至晚上9時集會結束，大批市民向灣仔及金鐘方向離開。

「我遊完行返到嚟見到有好多警員企晒喺樓下，成班警察企晒喺度望住你，好似你得罪佢咁，唔可以同佢有眼神接觸，有嘅話基本上都要搜袋。」Winnie形容當時有約五輛警車停泊，及逾50名警員站立於其住所外馬路上。她指自己當時站在天樂里內與警員相距約200米，現場有逾百名街坊圍觀及指罵警員，「有好多人都不滿，指罵佢哋，指罵完警察會話，『我俾第一次口頭警告你！你唔好再喺度講嘢！』咁有啲（街坊）真係會好驚，會縮囉。」

阿文和Winnie指，8月初時警暴仍未遍及整個社區，灣仔街坊的受影響程度仍因住處有異，大部份中年街坊都未有群起反抗之意，但及至9月，灣仔區內連續數周出現遊行及集會後的蔓延衝突，防暴警多次於接近民居的軒尼詩道進行驅散，許多街坊開始不滿警方向街坊舉槍及喝罵，反警暴氣氛越趨高漲。

阿文憶述9月初一次參與遊行後，沿軒尼詩道方向步行回家，「成隊警察又停晒喺軒尼詩道，行過就俾警察搵槍指住，嗰時我已經冇戴口罩，唔知點解仲要俾佢哋鬧。」他指當時身處鵝頸橋街市附近，不少人仍在街市買菜，現場大批街坊指罵警員，「都係鬧啲警察叫佢哋走，話『唔使你哋呀！冇用呀！』之類，之後啲警察鬧返我哋，『你依家參與非法集會呀！』，但啲人就應返佢『我依家喺屋企樓下，點樣非法集會呀？』。」

Winnie笑言，近半年灣仔街坊備受警暴困擾，市民與警員的對罵逐漸由近距離對話，演變成「地對空」的開咪對罵。「有次佢哋又棟晒喺我樓下，我喺屋企準備食飯，就喺個窗同佢哋講『我食飯啦！你冇得食啦，慢慢OT啦！』 咁佢哋跟住開咪話『好呀！我喺度等你！等到你食完為止！』。」Winnie指晚飯後警員的確仍在樓下戒備，「我咪落街同佢對話下囉！」她指同類情況，9月過後經常在灣仔區出現，不過一般都是晚上10時前結束，大部份上街抗警暴的街坊都會等警方上警車離開後才散去。

兩人均表示感受到灣仔區的街坊部份開始由藍變黃，即使仍是藍絲，都是討厭警察的「變種」藍絲。阿文指，10月初時警方同樣在其住所樓下戒備，又再度在沒有示威者下亂發催淚彈，「嗰次直頭射正我屋企樓下，搞到啲人出唔到嚟，我又返唔到入去。」他指當日樓下聚集了許多街坊及記者，兩人打算到樓下向在場人士派發洗眼用的生理鹽水，「點知我一開門出去，粒催淚彈就射喺我門口前面，之後都係向另一方面行走咗先，避一避再走返嚟，真係返屋企又死，喺街度又死。」

與Winnie及阿文同住的Winnie父親同樣是當日受催淚彈影響的街坊，兩人笑指Winnie父向來「藍到發黑」，「佢第一次聞到（催淚彈）嗰陣味都話好辛苦，佢到9月都仲撐緊警呀，係呢排直頭開聲鬧個電視機，話啲警察咁咁咁，跟住佢Winnie媽就話『喂！你藍架喎！唔係要撐警咩？』跟住Winnie爸就話『係呀我藍呀！但我依家唔鍾意警察！佢依家見人就打！見人就拉！好差囉！』。」 他們笑言，以往許多灣仔街坊都習慣看TVB電視直播，相信警察執法公正，「但佢哋依家直頭係望出窗外已經睇到直播，就會了解多少少件事嘅發生，起碼睇到件事嘅另一面。」坦言當警暴真正影響到街坊生活，平民百姓都必然走上街頭，抵抗警暴。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568