去年,甫推出即引起一陣哄動嘅積架X-Type,據聞今年嚟緊又會再有新動作;事關從來未有過中價轎車定位嘅積架,自從推出X-Type之後,確實引起咗唔少未嘗高檔積架車嘅朋友一陣迴響。有見及此,為要進一步拓展同穩定香港市場嘅佔有率,大概會響年中嘅6月,引入埋配備2.0公升偈嘅新款X-Type轎車,情形就正如平治嘅C200,又或者係寶馬320咁,希望利用一個相宜嘅價錢,以招徠更多用家從德國品牌轉投英國嘛!至於新款X-Type2.0嘅定價,經亞Mark一番打探後,極有機會較原來X-Type2.5V6型號便宜10萬有多,大概會係24萬左右。若然係真的話,相信呢款X-Type會係英國積架汽車有史以來,至價廉物美嘅四門轎車囉!又難怪新車未正式抵埗,就經已引起一眾同級日本同歐洲車嘅代理關注啦!