遠嘅唔講，淨係計03年油王入主車路士後，富豪球會鬥「米堡」都唔見有咩着數，04年4月主場被悶和0:0，唔算衰；到上季作客吞對方3蛋，就係「牙擦領隊」摩連奴領軍以來最大敗仗。衰開有條路，今季車路士又兵敗河畔，唔到你唔信「米堡」係「車仔」剋星。

「車仔」近況有好轉，林柏特腳風順，至於隊長泰利復出，後防無憂矣。不過，話晒「車仔」成棚人踢完國際賽，球員體能總有消耗，「米堡」未必無機會再偷雞。「米堡」07年踢5場聯賽失4球咁大把，鹹魚翻生嘅活基治居功至偉，呢位仁兄啱啱獲重召入英格蘭國家隊，踢完國際賽返聯賽又即刻同全國「第一鐵衞」泰利正面比拼，肯定有睇頭。
講到剋星，利物浦何嘗唔係食住紐卡素？仲記唔記得10年前奇雲基瑾領軍年代輸俾紅軍3:4嗰場經典作，「紐記」躉啲眼淚可能重未流完。近年，「紅軍」已經連續3次淨勝對手兩球，禮拜六作客聖占士公園照殺可也。「紅軍」剛啱被收購，斷估成班球員都識做踢場好波，等新老闆開心吓。