【新增圖片及內容】
韓國天團BIGBANG隊長G-DRAGON(GD)同女團f(x)前成員Sulli，日前被發現原來係好朋友，日前GD飛到巴黎參加時裝周，佢嘅自家潮服品牌PEACEMINUSONE都有喺當地搞展覽。

當日Sulli原來都有孖圈中好友具荷拉、女團Brown Eyed Girls成員佳仁去撐場，PEACEMINUSONE嘅官方Instagram曾上載一張Sulli、具荷拉、佳仁嘅合照，不過之後就刪除咗，有指具荷拉曾經同GD老友李洙赫傳過緋聞，所以有機會係李洙赫介紹佢哋認識。

不過有網民就發現GD同Sulli交情都幾深，有網民發現兩人戴同款心型戒指，兼疑似乘住同班機返韓國。話說GD先喺Ig上載手嘅照片，照片中佢手上就戴咗一隻寫上「sex」字嘅心型戒指，唔夠一日就到Sulli上戴嘆咖啡照片，當中亦可見佢手上戴上同款戒指。之後噚日就到GD上載一張喺機上自拍嘅照片，而Sulli亦同樣有上載機上自拍照，網民發現兩人乘坐同一個航空公司嘅機，而自拍時兩人甫士又好似，即時令網民覺得二人關係唔只朋友咁簡單。

而由於有呢啲巧合，網民都對二人關係大感好奇，加上Sulli又上載咗同GD經理人好親暱咁拍嘅短片，令粉絲堆都即時議論紛紛，當中有部份粉絲對於兩人戴上同款戒指，認為可能戒指係GD自家品牌出品，所以Sulli戴都唔覺奇怪。

而且眾所周知Sulli本身已經有男友崔子，今日崔子就於Ig公開Sulli穿透視裙打掃嘅照片，留言：「佢話幫我打掃，雖然好多謝，但總覺得要做嘅事情變得越嚟越多。」力證二人依然恩愛，所以網民都估計Sulli同GD只係老友關係，並唔係拖友。