31歲落選港姐李美慧今年6月跟56歲富商曾文豪奉子成婚，下月就係預產期，首次做媽咪嘅佢當然要影輯靚靚大肚寫真留念。幸福靚太李美慧噚日喺新蒲崗一間影樓影大肚寫真，李美慧懷孕後谷奶升級，陀女嘅佢狀態甚佳，手腳未有出現水腫。

李美慧全家總動員，不但有老公，仲有李媽媽同埋家中一對「毛孩」，分別係10歲貓咪LV和1歲多史賓格犬Dior，兩個毛孩好乖陪媽咪，李美慧笑言用名牌為寵物取名，全因為貪玩，「貓咪毛色好LV，Dior係緝毒犬，但因為佢一對手有少少外翻問題，唔合資格，所以我去領養佢返嚟，佢哋都好活潑，相處好好。」李美慧不時喺社交網為寵物發聲，愛心爆棚，即使佢懷孕都堅持唔會棄養，佢話：「好多人喺懷孕時遺棄啲寵物，會覺得佢哋對胎兒有影響，其實寵物係冇影響。除非寵物食生嘢，佢哋食番自己痾出嚟嘅便便，咁先有機會感染，但真係冇可能，點會食佢啲便便，好難會感染到。我懷孕期都日日親近寵物，一齊住，瞓埋同一張床，我啲貓狗見住我BB大，佢哋令我懷孕時心情輕鬆，將來BB都畀寵物幫手照顧。」

李美慧話呢次影大肚相，主題係要傳承愛，唔單止有寵物同老公，仲有母愛，佢最感恩當然係父母自幼栽培同愛護，所以有一輯相佢會同媽咪合照：「係母愛嘅傳承，我要多謝媽咪，我都想將來囡囡懷孕同佢一齊影。」李美慧話全日影相唔辛苦，腹中囡囡非常好動：「囡囡邊影邊喺肚裏邊郁緊，好雀躍，喺肚裏打boxing。」

懷孕8個月嘅李美慧，體重增加咗20磅，不過佢手腳冇水腫，非常纖瘦，全憑食得健康：「我好節制，做好多運動，其實大肚要多食蛋白質，相反食澱粉質就肥喺自己度，我就好鍾意食飯麵，我都肥咗，但有信心生完好快瘦番。」雖然距離預產期仲有一個月，但李美慧心急「卸貨」，佢話下月生B時會選擇自然分娩：「我希望順產，甚至唔會打無痛分娩針，自然痛就痛，我接受呢個挑戰，老公會陪我入產房，佢應該會剪臍帶。」

李美慧幸運遇上曾文豪，仲嫁入豪門，升呢做闊太，當然有條件富養囡囡，但佢話：「我唔會特別去富養，或特別窮養，中等咁養，佢想要嘅嘢，要自己去爭取，要付出先得，我想囡囡貼地啲，我一定唔會縱囡囡，我唔鍾意女仔嬌滴滴有公主病，我只想佢做一個有愛心嘅人。」想唔想囡囡步媽咪後塵嫁入豪門？李美慧話：「呢啲冇得強求，係緣份，嫁乜嘢人唔重要，最重要係嗰個人錫唔錫你，嫁一個唔錫你嘅，幾有錢都冇用，要揀一個志同道合，支持你嘅人。」李美慧自問唔係「嚴母」，佢唔會畀壓力囡囡，但好想囡囡將來做獸醫：「萬一街上遇到動物受傷，佢都可以即時急救，幫到好多生命。」

婚後李美慧被老公錫到燶，訪問中，佢全程笑不攏嘴，變成「李四萬」：「佢錫我必然，同佢相處好舒服，我哋志同道合，我哋鍾意keep fit。佢又好有愛心，會陪我去餵流浪貓。」李美慧大讚老公曾文豪係住家好男人，佢話：「佢係唔鍾意出街，我以前都拍過拖，好多男仔鍾意打機，成日見個男朋友背住我，我希望有個人push我，大家一齊進步。」李美慧畀老公99分：「扣佢一分，唔可縱佢，畀佢進步空間。」李美慧成為人妻3個月，佢又評自己有幾多分？佢坦言：「我應該都99分，我盡力去做。」下月生埋女，做埋媽咪咪攞滿分？李美慧笑言：「可能會扣分，我未生過，唔知點去湊大一個女。」

精選娛聞，喺晒《娛果》
http://fb.com/appledailyent