新派武俠小說宗師梁羽生病逝，佢生前任職嘅《大公報》噚日聯同天地圖書開座談會，邀請新知舊雨讀者擁躉一齊紀念大師，有成300人到場，包括梁羽生兒子，另一武俠小說大師金庸都有現身，仲披露咗兩人對對方作品嘅評價，兩大宗師「論筆」，究竟誰勝誰負？
金庸噚日透露，今年農曆年前，仲有同梁羽生通電話互相拜年，當時梁中氣十足不似病重，事後回想，可能當時係梁羽生迴光返照最後日子。對於梁羽生逝世，金庸話感到十分難過。外界多指梁羽生開新派武俠小說風氣，金庸則發揚光大，金庸話認同呢個講法，但強調佢寫武俠小說唔係受梁羽生啓發。

梁、金小說擁躉眾多，不斷有人將兩人作品比較，可惜寫小說唔同練武，唔可以上華山論劍一較高下，金庸噚日稱，其實兩人曾討論作品優劣，佢引述梁羽生批評，金庸筆下江湖人物往往正、邪不清，穿插歷史事件時亦同正史有距離。金庸話佢接受批評，承認自己寫作「好唔規矩」，因為既然有歷史書，小說之言何需依書直說？
咁金庸對梁羽生作品有乜評價？金庸指梁嘅作品民族觀念、歷史觀念都好正確，人物非常俠義有俠氣，正派、邪派分得好清楚，呢啲係梁羽生筆下江湖嘅特色。金庸又話最佩服梁羽生中文造詣高、國學底子厚，兩樣佢都自愧不如。文無第一、武無第二，究竟兩位大俠認為邊個先係武林小說嘅盟主呢？
金庸話梁羽生為人隨和，從來唔計較輸贏，對好多事情都一笑置之，佢最欣賞《白髮魔女傳》同《雲海玉弓緣》。照佢咁講，八方相信梁羽生亦唔會太重視虛名。
武俠小說喺新世紀好似無以為繼，雖然近年好多人加入江湖，亦有無數人喺網上建構俠義世界，但始終未成氣候，金庸噚日坦言新世代武俠小說家「唔得、唔好」，堪入目者僅鄭丰，佢𠵱家搭飛機，有時會買本小說機上消磨時間，買得落手嘅都係古龍、梁羽生或卧龍生舊作，幾人都已作古，講到呢度，大俠都不禁顯得有啲欷歔。
mailto:[email protected]