【港版國安法.拆局】藍絲又被騙!美國佔香港出口 比你知的大得多(謝比特)
謝比特
香港工貿處網頁數字顯示,美國佔整體香港出口為7.7%,而非港府所指0.1%。
偷換概念,語言藝術,就好似德成女傭,融入家中咁,徹徹底底融入咗我哋嘅香港政府。
人大通過「港版國安法」後,特朗普隨即宣佈香港已等同一國一制,稍後時間會取消香港特別關稅區待遇。政府為安撫人心,終於發聲明,話美國取消呢個關稅優惠對香港影響輕微。為咗支持佢嘅論點,尾段仲拋咗少少數據出嚟俾大家睇。
作為藍絲首領嘅民建聯,當然秉承一貫藍絲唔Fact Check嘅作風,就咁搬字過紙,話取消關稅優惠,美國先係大輸家。究竟事實係咪又係咁樣呢?事不宜遲,作為二流分析員嘅我,即刻去Fact Check一下。
其實最令我懷疑嘅就係,藍絲不停引述貿發局環球市場助理首席經濟師陳永健,指取消香港特殊關稅地位影響不大,因為美國佔香港整體出口只有0.1%。究竟呢個數字究竟係點嚟嘅呢?
首先我上網輸入「香港美國貿易」,已經可以聯繫到香港工貿處嘅網頁,當中列出咗2019年嘅貿易數據,大大隻字寫明,美國佔整體香港出口,係7.7%。我真係唔明,0.1%呢個數字,又係點嚟嘅呢?
如果講淨出口,7.7%先係一個真正嘅數字。數字就係死嘅,我都唔知7.7%究竟有幾重要,不過睇返呢個數字,原來已經係排緊第二位,而且喺2019年11月,工貿處就特登出咗份文稿,簡介一下美國同香港嘅貿易,叫做「美國與香港特別行政區貿易摘要,而且淨係美國先有份,咁仲話唔重要?
文稿第三點指出,喺2018年,出口美國佔香港整體出口9%,總值460億美元(3,500億港元),而從統計處之列表,過去10年都係3,000億港元以上。睇到呢個數字,更加令我懷疑,點解2018年係3,500億港元,而2019年就只有37億港元差咁遠?
我相信,平時講出口,唔會講淨出口,應該包括咗轉口呢個數字,因為轉口都係真真確確由香港運出去嘅貨物。咁就提醒左我,美國大可以向香港對美國轉口貨物收關稅,影響嘅,就唔只係淨出口,好大程度,都會影響埋轉口美國嘅貨品。2019年,轉口美國呢個數有3,003億港元。特衰政府就特登唔提呢樣嘢,搵淨出口同你計,蠱蠱惑惑。
從工貿處嘅列表裏面,2019年香港總出口貨值係477億港元,總轉口貨值係39,409億港元,合計39,886億港元,如果將37億除以呢個數,咁就得到0.092%,不足0.1%。嘩!咁都得?原來為咗可以令個數字睇嚟細啲,就咁將淨出口做份子,份母就用淨出口加轉口嚟計。
打個比喻,有間生果鋪,自己種嘅水果做咗100蚊生意,當中蘋果賣咗10蚊,而呢間生果鋪其實主要做寄賣生意,生意額有400蚊,當中寄賣蘋果做咗40蚊生意。人哋問佢,咁蘋果佔你嘅銷售額幾多啊?佢將自己種嗰10蚊除總生意額500蚊,佢答人只係佔2%,佔生意額好細啫,嗰40蚊寄賣就唔計。
另外,有一樣嘢,都睇到我搲曬頭,佢哋猛話美國上年喺香港,有261億美元嘅貿易順差。假設美國加咗香港關稅,美國人買少咗香港貨,咁個貿易順差咪重大囉,咁點解會話人哋損失多咗呢?
我諗佢係假設咗,當香港被徵收關稅嘅同時,香港亦加返美國佬嘅關稅,令到香港人買少咗美國貨。如果係咁樣,都會俾佢講得通。不過,究竟香港政府夠唔夠膽加返美國佬嘅關稅呢?特衰政府去到今時今日,佢都未講話會向美國報復,所以我覺得就未必會咁做。
咁點解未必會報復呢?其實香港接壤中國,位於亞洲,食品方面,主要從中國及東南亞輸入,日用品設備方面,其實可以從就近嘅日本南韓輸入,所以要向老遠既美國輸入得嘅產品,好多時都應該係一啲最頂尖嘅高科技產品。唔係我吹㗎,從統計處2018年嘅數據,電訊設備第二大入口國,就係美國。我估計呢啲產品,可以話係唔買唔得。而最後嘅買家,更加可能係中國嘅公司或者政府,加咁重稅,買貴咁多,最終嘅受害者,咪就係最後個消費者囉,完!
-----------------------------
-----------------------------
屬於香港人的移民攻略
立即登入
【全球樓行】 Dream House零距離