新民黨主席葉劉淑儀早排失意特首跑馬仔，又出現退黨潮，不過事隔一排，又係一條好漢。

噚日身穿行政套裝嘅葉劉，同囡囡葉榮欣（Cynthia）喺中環ifc行街，囡囡着咗一套紅色連身裙，望落非常搶眼。

兩母女先入到一間賣較young啲嘅時裝店，囡囡自然睇得好開心，葉劉似乎冇乜心水，睇咗陣就轉場。

稍後兩人行到一間專賣唇膏嘅店，起先各有各睇，囡囡睇到好入神，仲不時問店員意見。身為媽咪嘅葉劉見囡囡咁有興趣，專登幫手揀咗支心水唇膏遞畀囡囡，點知佢望都冇望，繼續同店員交流，仲將唇膏畫上嘴仔，係咁打圈圈試清楚隻色。

感到被忽視嘅葉劉，冇癮之下惟有行去門口，邊等邊玩電話，至5分鐘後囡囡先至睇完，兩母女又係空手離場。

最後佢哋再轉戰另一間，taste較成熟女裝店睇衫，今趟輪到個女全程玩電話，葉劉不停揀心水，拎住啲外套度下，可惜最後都係買唔成。似乎想喺葉劉身上想賺一個仙都好難，完全違背女人天生購物狂嘅特性，而且葉劉行路嗰陣條腰似乎有啲事，行得好慢，臉上毫無歡容，表情繃緊。

空手而回嘅兩母女離開ifc，在等司機期間嗰短短幾分鐘，葉劉絮絮不休起勢向囡囡講嘢，唔知係咪訓話，直到架車到先收口。

唔知上到車又點呢？