當年今日
關於我們

T富商終極現身數Karen
「搵個23歲細路,錯到不得了」

蘋果日報 2009/02/25 00:00


現年23歲的港男黃長發,被揭搭上鄧姓鞋王T富商的39歲三奶李姿霆(Karen),因二人公開舉行記者會力證愛得癡纏,成為城中話題。連日來T富商一直沒有就事件表態,直至前日他終於站出來,力指Karen大話連篇和跟23歲的細路拍拖太任性,又謂二人關係已煙消雲散,往後Karen的生活只能靠自己。
黃長發與李姿霆去年12月6日在一個朋友派對中認識後,一見如故,迅速打得火熱,Karen瞞着哎吔老公鄧姓鞋王T富商與黃長發拍拖,後來東窗事發更高調舉行記者會承認戀情,黃長發更表示為女友退出娛樂圈,旋即成為全城熱話。連日來黃長發、其胞兄黃長興、Karen及其家人先後就事件表態,但事件另一位男主角T富商始終未有就戴綠帽這件瘀事開腔,前日他終於打破沉默接受本報專訪,還公開了一些他與三奶Karen的對話錄音(對話內容見附文)。
從T富商提供的本月8日錄音對話中,原來Karen是在與黃長發公開戀情前一晚,才向T富商提出分手,而男方欣然接受之餘,還像教女般指她不應愛上一個「細路」,他說:「今次你搵個法國仔,細到23歲嘅細路,真係錯到不得了,個個好失望。」並勸她不要太任性,並叮囑她要好好照顧女兒。而當T富商三番四次追問Karen是否跟黃長發拍拖時,Karen由始至終都否認其事,又聲言不會做出傷害老公的事情。難怪記者會當天身在內地的T富商看到報紙刊登Karen與黃長發的親熱照後,會怒火中燒。
empty
《02年》
孽緣萌芽 面見正室
empty
T富商提供了兩張照片,力證02年他與Karen開始發展戀情時,曾安排女方出席其子的婚宴,從沒向Karen隱瞞自己已有家室的事。
兒孫滿堂
無意爭女兒撫養權
T富商接受本報記者專訪時,承認他自己及家人都因Karen高調搭上黃長發而受困擾,他前日說:「我一向做人都好低調,如果佢(Karen)唔係講咗咁多唔係事實嘅事,我都唔想企出嚟講咁多嘢,總之今次係我唯一一次亦係最後一次講嘢,以後唔會再講啦!總之我想講我哋協議分手後,我已經冇再同Karen聯絡過,更加冇跪地求佢復合,佢做出咁多事嚟呃我,你認為我哋仲可能復合咩?佢已經行錯路,將來佢後悔就遲啦!成件事最慘係個女,個女5歲一直係食好住好,魚就要係斑類先肯食,平時又鍾意食鮑魚、魚翅同燕窩,以後唔知個女仲有冇咁嘅生活條件。」
對於有傳聞指T富商有意與Karen爭女兒的撫養權,他否認說:「我已經有5個孫啦,不必去爭,你諗吓!我爭番個女嚟交畀邊個湊呀?等佢跟番媽咪啦,我原本係幫個女供緊一份教育基金,到個女18歲時就可以攞番1,500萬,但受益人個名寫咗Karen,𠵱家佢搵個大細路,我唔相信佢會將呢筆教育基金留畀個女,咁我當然唔會咁儍仔繼續供錢啦!」
empty
在鞋業甚具名氣的T富商,不時會接受傳媒訪問。
empty
張耀榮二姨太(右三)的女兒02年嫁給T富商正室(左二)的次子時,兩家親友難得合照。
嘲爛桃花
「大把女仔話想跟我」
據聞T富商與Karen分手後已沒再付她每月8萬元的家用,二人聯名的匡湖居也不准變賣,實行經濟封鎖Karen,對此他笑說:「如果佢唔大使,手頭上嘅錢應該足夠佢兩母女過活。」
有指Karen一度深得T富商歡心,故近幾年來獲他送贈價值逾數千萬的鑽飾,T富商哈哈笑說:「我送畀佢啲首飾賣出去都唔值錢,因為冇證書。」為何不送有證書的首飾?他說:「因為我同佢都冇證書,所以咪買冇證書,你估佢係章子怡,要買有證書嘅畀佢。佢如果同我唔夾,大家講清楚分手,我係冇所謂,大家仲可以保持一個良好關係,但佢唔好當我儍嘅,一直同我講大話。」
T富商表示早年曾往批鐵板神算,他說:「當時批我話一字忌之曰李,提過我姓李嘅人掂不得,我賭氣唔信,𠵱家果然係,冇得拗頸。」被預言不適合跟姓李的人交往,可是T富商偏偏戀上姓李的Karen,結果Karen瞞着他搭上黃長發,現在果然證實二人無緣。
發生三奶紅杏出牆事件,T富商謂不得不承認桃花太旺不是好事,問他會否再找其他女人取代Karen的三奶位置?他搖頭說:「唔會啦!真係幾鬼煩,我𠵱家係覺得好醜,連拖個女出街都驚俾人笑。」正室和二奶有沒有因此事嘮叨?他皺眉說:「梗係會有,我咪同佢哋講,係咪要我喺樓上跳落嚟呀?又怕俾狗仔隊跟,𠵱家搞到件事咁揚,真係累死我,大把女仔排晒隊嚟,因為佢哋知我咁易呃,又有錢,個個女仔都話想嚟跟我,你話煩唔煩?」
否認欺騙
指三奶早知有家室
對於Karen早前指T富商與她相好時一直隱瞞有家室,T富商前日展示了兩張02年其正室次子結婚時的照片,原來當時Karen也出席了這個婚宴,而且還與T富商的正室握手。T富商說:「02年我喺兩個做保險嘅女性朋友介紹下認識Karen,後來我個仔結婚,我就請埋佢3個嚟飲,當時我同佢都算係啱啱開始緊,所以佢又邊會唔知我有家室呀?佢講乜嘢都好,總之我同佢已經乜嘢關係都冇,只想佢好好養育個女啫!」
親撰三言詩嘲諷三奶
「桃花劫,今朝醒 六年遇,如煙雲 拜觀音,重口德
 過去事,何追問 將來事,天曉得 百行事,孝為先
 因果報,必自受 最可悲,禍及兒 問世事,情何物
 千金盡,萬物變 再回首,後悔晚」

前日T富商接受記者專訪時,被問到目前心情如何時,他立刻拿了一首詩出來,說:「呢首詩係我作嘅,完全代表咗我𠵱家嘅心情同睇法,你哋照登啦!」想不到經營鞋業逾30年的T富商,原來曾經教書,肚裏還有一點墨水
指三奶連累女兒
T富商更不斷問記者是否看得明該首詩,後來還親自解讀一番,他說:「『桃花劫,今朝醒』,呢6年幾同Karen感情就係一個桃花劫,我就好似入咗個狐狸洞唔識走番出嚟,今日終於醒啦。
「『六年遇,如煙雲』,就解讀呢6年嘅相遇,好似煙消雲散咁,我哋嘅關係比覆水難收更加冇可能有得回頭。『拜觀音,重口德,過去事,何追問,將來事,天曉得。』就係我信觀音,好重視口德,過去嘅事唔想理啦,至於將來嘅事,邊個知呀?」
T富商又說:「我覺得孝順係好緊要,Karen咁樣呃父母,將來因果報應時,佢就一定自己受番,但最慘佢要累埋個女,到有一日佢俾人呃晒啲錢,後悔想回頭佢就會恨遲啦。」