前晚新民黨筵開九十幾圍慶祝四周年，主席葉劉淑儀深知唔少佢嘅選民都係公務員，好識做咁請咗公務員合唱團上台獻唱，葉太更藉呢個機會向中央示好，透過合唱團大唱紅歌，一開始就唱《歌唱祖國》、結尾就唱《中國人》，葉太全程身穿紅色大褸，紅得緊要。
可能葉劉始終不及民建聯，中聯辦張曉明今次未有價值幾千萬嘅字畫供拍賣，只係有張「聖旨」，透過葉劉致辭時宣佈，大讚新民黨旗幟鮮明反佔中，是非分明。葉劉喺台上當然繼續批佔中，問吓台下嘉賓，「我哋係咪經歷咗痛苦嘅八十日？係咪噩夢呀？係咪唔想再見到呢啲佔領呀？」可惜台下反應冷淡。