割地賣港、滅村起豪宅嘅新界東北發展，搞到狼振英政府焦頭爛額。上星期五，《文匯報》出手做嘢，整咗篇〈圖謀癱瘓新東發展規劃　黑手大起底〉報道，話要揪出反國教、反新界東北規劃等社會運動嘅真正黑手，話佢哋係「反對派黑手黨的團夥，層層疊疊、複雜程度較娛樂圈情侶圖更甚」。

起底報道引起好大迴響

呢篇咁驚世嘅報道，引起八十後好大迴響，令佢哋笑足成個周末。八方嗰日聽到有人講呢篇起底報道，即刻衝落街買報紙，點知報紙架上嘅《文匯報》一早俾社運青年掃光呀。篇報道真係好多料爆㗎，例如話其中一位「黑手」葉寶琳，「有社運女神稱號，曾因『三點式艷照』曝光成為網絡紅人」；「葉寶琳的丈夫王浩賢則是候任會計界立法會議員梁繼昌的選舉經理」。
好多人士讀到呢度，先知道Bobo同浩賢呢對社運情侶，原來連婚都結埋。嘩，做乜唔請飲呀？查實佢哋仲未結婚嘅，社運女神無端端「被結婚」，相信浩賢同葉媽媽就最開心嘞。唔少被點名嘅八十後一於少理，拎住呢份報紙齊齊合照放上網，繼續快樂抗爭。