【新增網民意見】
荔枝角美孚新邨與香港共渡半世紀，而第一代業主、年逾八旬老翁林伯，絕對是美孚新邨忠實粉絲，連個仔都在美孚新邨住，三代同堂！隨着樓價飛升美孚平均呎價高見1.5萬元，但林伯一再強調無意換樓，「唔賣、唔賣！」

70年代初，當時約30多歲的林伯，買入一個2期吉利徑19號中層B室，樓價4萬，以當年10%首期，即4,000元上車，之所以買「磚頭」，其實只是想擁有自的物業，「果陣時我已經結左婚，不過諗住遲早要搬，果時紅磡(租住單位)個業主幾好，但佢隔一年又起下租呀，咁諗下不如自己買啦。」話畢，他一度望向荔枝角公園，憶述「以前呢度海黎，圍牆底下就係海，呢個公園係填海，全海景架！」

入住2期的單位約10年後，為了兒子生活得更舒適，一度細樓換大樓，單位亦爆升10倍，當時實用638方呎的2期單位便以40多萬元沽出，再花80多萬元買入，面積大2倍實用1005方呎的8期百老匯街104號極低層C室單位，其後林伯個仔結婚才搬出去，不過都是住美孚新邨另一個單位居住，「(如今)個仔40幾50歲，我個孫都成10歲咁濟。」

提到買樓，林伯話，當年買樓不需做按揭，「係向美孚自己本身大業主買架，間屋本身4萬幾，但係頭果兩年無屋交，即係樓花兩年，每個月就比1%，即係400多元，同我呢面(紅磡)租屋一樣，但要供12年144期。」每個月供400多元，再加租樓400多元，對當時來說是天文數字，林伯做「鐵飯碗」的政府工，供樓當然無問題，「我係政府工，人工果時千幾蚊，都要一半人工去供樓。」

當年數十萬元的物業，如今已升值20倍，「而家我諗千六萬，因為我點知呢，利嘉閣久唔久派D紙仔入信箱度。」不過林伯完全沒有轉讓的想法，「唔賣！唔賣！買左邊有地方住，賣左無得住，都唔會搬；第8期有度好，無車路，夜晚聽唔到車聲。」

另一位第一代業主盧太，如今已67歲，1976年多得從商的丈夫才能買入如豪宅般的美孚新邨，同林伯不同的是要做按揭，「我先生做生意架，佢做假髮生意，一個假髮賣100幾蚊，做按揭架，佢有能力比晒，如果唔係政府追稅架麻，果時應該20幾厘息，最高息的時間，好彩做生意。」

住了逾40年，盧太十分喜愛美孚新邨的居住環境，「呢度環境一流，呢個公園係用錢賣唔到，我地以前新界買過間屋，鍾意有個花園，但你發覺要打理佢係好痛苦，但而家你唔需要去打理，你已經有啦；第2呢，我地以前好中意去九龍公園做運動，但係好雜，呢度就我地邨內人用，就無咁雜，好多時中秋，都有啲中秋節搞下。」

盧太又形容美孚新邨當年猶如豪宅一樣，「其實呢度都係當發展豪宅，我地入去果時有晒浴缸架，一般樓邊度有浴缸架，佢真係豪宅Feel。」盧太說，美孚第一間物業是第4期百老匯街109號，實用面積500餘呎的2房單位，樓價大約9萬元，其後丈夫再斥資近20萬買入同座同室但較高層的單位，並入住，而原來的單位則放租。至2015年，最早的單位因為較難出租，以500萬元沽出，賬面勁賺逾490萬元，期內升幅多達54.6倍。

問到現時樓價會否大跌，盧太認為要政府出手才有機會，「如果政府做野，樓價會插水，但而家政府唔敢做野，因為驚樓價好似以前沙士咁，負資產仲慘過高樓價，高樓價你會步步為營唔敢去買，但係一個負資產大小通殺，好慘囉。」

年初有研究指出，香港樓價中位數為619.2萬元，港人要不吃不喝19年才可置業。上世紀六十年代，文員月薪大約100元，一杯奶茶約4毫子。即是當年一個文員要不吃不喝18.3年才能夠買到美孚新邨一個售價兩萬元單位。難怪在六十至七十年代，美孚新邨有「市區豪宅」、「中產屋苑」美譽，並不是一般市民所能負擔。

以下擷錄網民意見：
Sheila Ng：嗰時上海街啲樓仲要倒夜香，厠所仲浴缸no way。
Chin Tony：我們當年是全家人一起打工出來供第一層樓，賺到了才賣出去，然後兄弟姊姊也有首期了。
梁山人：其實，香港經濟冇可能再好似70年代末，80咁急促增長，升職及每年人工加幅高過通漲，供樓自然冇咁辛苦。

記者：葉煜燊

全球樓行 Dream House零距離
https://hk.feature.appledaily.com/overseasproperty