早前無綫電視節目中，港媽一句「贏在射精前」引起全城熱議。昨日沙田馬場頭場1,200米新馬賽片段在網上熱傳，「巴基之星」雖然出閘脫腳，一直落後其餘13匹馬，但最終憑後動奪冠。片段被網民上載至facebook不足一日，已有近萬人讚好、「畀嘩」及「畀哈哈」，近7千網民分享短片，並留言指「好有勉勵性」、「未到最後都唔好睇小人」，更直言「好想share比果位話贏在射精前香港大媽睇咩叫做輸在起跑線，贏在終點線」。

7月1日沙田泥草第一場新馬千二米賽事，14匹馬參賽爭標。由片段中可見，「巴基之星」出閘大脫腳，曾落後逾10個馬位，由千二米跑至尚餘至終點前200米仍不見其身影於首6名中，怎料「巴基之星」於最後直路發威，窮追十多個馬位，最終反勝一直領先的「兄弟熊」及「可人兒」兩個馬位奪冠。

不少網民紛紛留言，指「Cap低呢條片可以用來教育啲成日將贏在起跑線掛在唇邊嘅家長」、「證明輸在起跑線但贏在終點線」，認為「巴基之星」在大落後的情況下，「有鬥心，堅持，唔放棄，成就了牠」，直言「大巴大巴咁車落去班贏左射精前嘅怪獸家長」。

「巴基之星」是由巴基斯坦裔商人馬主KermDin以600萬港元投得，Kerm指練馬師告東尼在拍賣當日指，「巴基之星」是全拍賣會上最好的馬，故決意競投。至於臨尾失落冠軍、由田泰安策騎的「兄弟熊」，其實來頭亦不小，今年5月曾經跑贏由本港目前唯一女見習騎師蔣嘉琦策騎的大熱馬匹「阿凡達」。

【網民點睇】
StevenKwok：巴基之星德國馬黎架！學下人德國教育啦！頭800米都係俾佢玩玩下咋！

MaggieSin：隻馬就係要故弄玄虛，話俾大家知：我係得嘅！

MaggieJenniferMargert：最終唔係贏在起跑線，而是變左中期無限催谷，家長們又最終都係會做怪獸家長，只係變左中後期。

JoanneChoi：有時真係唔一定要贏在起跑線，會留前鬥後，贏在終點線才是王道！

WesleyChan：嘥氣啦……輸在起跑，贏在終點。有幾隻？咪就只係依隻囉……依個就係人生

NatalieChan：我不看賽馬，但這場賽事實在令我禁不住一看再看，看跑馬悟人生

FayeLau：唔洗理條起跑線，勁就係勁。

HinscoWT：做隻出色的馬仔……