【韓流】受罷工影響?韓藝瑟新劇二度延期 新一季《推理的女王》大換血
韓藝瑟推理的女王20世紀少男少女MBC罷工
韓國MBC電視台早前被爆有內部黑名單,各員工因政治立場而被劃分等級,令一眾員工大感憤怒,於本月初決定大罷工,令多個節目、劇集受影響。
而早前曾來港取景、由韓藝瑟、金基石主演嘅MBC新劇《20世紀少男少女》,亦受罷工影響曾一度中斷拍攝,不過早前已復工開拍。劇集原定大前日(25號)首播,但當日MBC方面就指劇集會延至下月2號先開播,點知今日MBC方面就表示《20世紀少男少女》將順延多一周先播,即下月9號先進行首播,已經係該劇第二次延期。不過《20世紀少男少女》製作公司就指延期只係為咗提高劇集嘅完成度,暗示與MBC工會罷工無關。
另外,除咗MBC工會罷工外,KBS電視台亦有員工不滿KBS高層剝削新聞自由、無視員工意見,故響應MBC工會,同樣於本月初起開始總罷工。而KBS方面今日指由崔江姬、權相佑主演嘅《推理的女王》正籌備開拍第二季,不過除咗兩位主角崔江姬及權權可以留低外,其他演員以及幕後工作人員都大換血,就連導演都唔同咗,唔知係咪一樣受罷工影響以致更換幕後人員?
《推理的女王》於今年4月5號至5月25號喺KBS電視台播出,講述天生推理能力強勁嘅主婦(崔江姬飾)與熱血警察(權相佑飾)一齊查案,劇集播出時平均收視率喺10%左右,有固定嘅觀眾,而新一季《推理的女王》預計明年1月尾播出。