曾演出韓劇《WhoAreYou-學校2015》及《第二個二十歲》嘅20歲女星池河允因飽受跟蹤狂迷滋擾,令佢忍無可忍,前日於網上公開狂迷嘅照片作警告,不過就引來網民抨擊,指佢反應過激。
前日,池河允於Instagram公開該男狂迷嘅相、姓名、年齡及狂迷嘅短訊截圖,留言:「呢個人已經跟蹤咗我好多年,佢試過去我屋企,跟蹤以及影我相,因為行為太過分,我會舉報佢。我已經試過無數次警告及無視佢,而佢都表示會停止,不過佢嘅跟蹤行為變本加厲。我要證明俾佢睇,我唔止口頭警告,我公開呢啲,咁佢就會知道。」
不過網民就唔多支持池河允,更留言批評佢:「對方有幾煩要令你公開佢個樣?」、「你公開對方個人資料,呢個行為算唔算誹謗?」、「你名氣有多大?根本唔值得跟蹤。」等,而池河允隨後已刪除相關照片及資料。