雖然欄目名叫財經評論，應該只係講財經嘅事，不過筆者最近睇咗段唔關財經事嘅新聞，想喺到分享一吓，等多啲人了解呢段歷史。事緣港媒《香港01》早前派記者去倫敦的英國檔案館，查閱有關1989年嘅解密檔案，其中更包括當時震驚全球嘅「六四民運」資料。及至周三上午，《香港01》刊出題為「英引中國國務院情報　27軍掃射軍人　逾萬平民死亡」的報道，講述英國「六四」期間所收集到的情報。（原文： http://bit.ly/2BK2URY ）

值得注意是，報道刊出不久，報道連結即顯示「找不到網頁」，雖然相關報道晚上重新刊出，但內容已作多番修改。例如標題改為「英引中國國務院人員：27軍掃射　學生、士兵皆中槍」、消息人士由中國國務院的委員改為中國國務院員工（member of State Council），而更重要的，是把27軍用「無差別攻擊」方式清場及國務院內部估計至少有10000名平民死亡的一小段刪去、屍體被裝甲車輾過再壓成「餡餅」並用推土機收集的細節亦消失得無影無蹤，另外，原文引用《壹週刊》引述美國白宮解密文件，估計死亡人數逾一萬人的一段亦被改為「六四」時擔任新華社國內新聞部主任的張萬舒指「六四」期間只有700多人死去。

究竟點解要咁大篇幅修改內文，《香港01》總編輯龍景昌回應傳媒時就話「篇文寫得唔好吖嘛」，而且有唔準確同誤導性內容。的而且確，「委員」、「員工」呢類字眼好易會譯錯，但有啲細節明明有英文原文字眼參考，而且假假都叫官方資料，總有一定可信性掛，突然刪去仲話個記者寫得唔好實在令人費解。筆者年資尚淺，當然唔敢話呢個決定啱定錯啦，但希望公眾可以比較一吓原文，更全面咁諗呢件事。畢竟歷史需要真相、社會未來發展需要真相、死者家屬更需要真相。

講起真相，主打深入偵查報道嘅傳真社（Factwire）得返好少營運資金，面臨倒閉危機，如果大家都覺得社會需要真相、需要深入報道嘅，不妨應創辦人吳曉東呼籲，捐款支持。

記者：莫亦熙

蘋果財經，關心你飯碗
http://fb.com/appledailyatm