當年今日

隔牆有耳:有線人花紅雙糧冇聲氣 - 李八方

蘋果日報 2018/01/03 00:00

隔牆有耳有線永升

上年對於有線電視嘅一班員工嚟講可以話係迷茫嘅一年,年頭公司生死未卜,人心惶惶,唔少人選擇走為上着,公司暫停填補人手;其後新世界主席鄭家純以及遠展主席邱達昌嘅永升於9月中正式入主,但至今3個月,似乎仲未完成交接,之前自然流失咗嘅人手都未補番。
下個月中就係農曆新年,但內部傳出以往喺12月底完成嘅薪酬檢討要推遲到3月底,到時先知有冇人工加,而最重要係舊年1月底出嘅花紅雙糧,今年都唔知趕唔趕得切過年前出。有線回應話,「管理層現正就集團的營運狀況及來年財政年度的業務展望作深入檢討,並將於三月份完成及公佈整體薪酬檢討方案」。
查實今年係純官同老虎仔入主後第一個新年,希望一班有線員工有個好開始,唔使再擔驚受怕,過唔到年啦。