噚晚杜德偉開騷，當然有嘉賓環節啦，呢晚就係大馬歌手李幸倪(GinLee)打頭陣，合唱《不走》，着住黑色露背裝，顯得有啲肥嘅GinLee，一開聲就係高音，絕對係晒靚聲，Alex話：「佢係監製介紹，當年錄《不走》呢首歌喺LA請咗個黑人女高音去台灣錄，佢唱到證明好厲害。」

GinLee亦話：「我專程喺大馬飛過嚟，廿年前見過你，當時你係喺大馬商場歌，我一早去排隊，但我企好遠，見到你好細粒。」之後佢哋再合唱《真的想你》。

另一嘉賓係Big3，點解係3唔係Big4呢？因為張衛健冇嚟，得蘇永康﹑梁漢文同許志安，佢哋合唱《信自己》，呢個時候見到邱淑貞忽然現身嘉賓席，咁遲嘅？

講番Big3，唱到一半，健仔喺頭頂個大銀幕出現，同佢哋同步跳，4個人唱完落台，健仔都同步落台，但冇兩秒健仔又再係銀幕出現，當然係間場俾Alex去換衫，健仔就講笑話：「我換衫好快，我做任何事都好快，唔信問下我老婆就知。點解有Big3三隻佬跳，佢哋夠膽同我跳，唔怕我一巴一巴星埋去。」

佢再同Alex講：「依家十點幾就完，咁就三隻講byebye，唔係話哮喘發作呀?Eason都唱六粒鐘，軟硬都四個鐘，Big4最揸流攤都三個鐘，大家一齊『dun』地嗌encore啦!」



識睇，一定係睇足英台【英波Live】：

http://soccer.appledaily.com
http://bit.ly/engballlive