樂隊RubberBand最近獲邀創作咗一首以運動為主題嘅新歌《Moving On》兼拍咗條短片，日前RB其中三位成員泥鯭、阿偉同阿正就喺天后一間Gym Room按受訪問，講吓今次創作嘅主題。

泥鯭表示普遍港人工時長兼缺少運動，故希望透過今次創作呼籲大眾齊齊動起來：「今次同Manulife合作，為佢哋全新嘅Move Kit做咗首歌兼同拍咗條短片，向大眾宣傳做運動嘅好處，同時提醒咗我哋，尤其嚟緊九月我哋Rubber Band就會開演唱會需要好多體力，所以呢個Move Kit係提醒我哋要做運動，保持體能水平。」

旁邊嘅阿正就笑笑口話：「其實我哋嘅水平就係冇水平。」阿偉就笑住講：「我哋係由零開始，其實做運動有心係唔怕遲，由依家開始做都得。」

除咗作歌外，四位成員亦專程拍咗MV，講起拍攝過程，阿偉話：「過程係好大挑戰，除咗要做運動，仲要有啲舞步要配合，講真我哋拍嗰日真係好多蝦碌。」泥鯭續稱：「跳舞呢樣嘢基本上係我哋入行生涯嘅第一次，仲要有排舞老師幫我哋去設計一啲動作，排舞師已經好錫我哋，基本上幫我哋度嗰啲動作我哋都可以做得到。」阿偉稱今次係好嘅示範，證明如果我哋都跳到做到即係大家都可以做得到。

咁幾位成員平日多唔多做運動？阿偉話：「其實我哋個別都有做，例如6號鍾意做瑜珈，阿正係網球王子，佢自稱以前係校隊，我自己就鍾意踢波。」旁邊嘅阿正話：「咩自稱呀，我以前真係校隊嚟㗎。」至於泥鯭就最坦白：「我就好耐都冇做運動啦，因為我打鼓本身運動量已經好高，當然呢啲係藉口嚟嘅，我會盡量遊水保持心肺功能。」

講番佢哋九月舉行嘅演唱會，係咪已經要開始操體能？泥鯭話：「我諗最需要操嗰個係我，佢哋其實個個都好Fit。」除演唱會外，樂隊亦在同步制作新大碟：「幾位大哥終於做好啲歌，依家開始錄音，暫時已經錄咗一半，希望盡快完成，因為演唱會有好多嘢要準備。」

場地提供：RY Fitness

精選娛聞，喺晒《娛果》
http://fb.com/appledailyent