馬圈內人脈關係錯綜複雜，大家見唔少騎練合作有時糖黐豆、有時就水溝油，甚至大纜都扯唔埋亦有。

資深倉主大摩多年來用人算係多元化，雖然今季請咗主帥，但頭馬卻非一面倒傾向貝湯美，不過這位祖籍澳洲的練馬師，近年甚少跟一位鄉里合作，而今季更只有一次交易咁大把！

所指嘅正係柏寶，這一位已退居二線嘅騎師，季內只曾策騎過一匹摩廐馬上陣，為2月4日的「綠勇士」，當時出爭一場1400米成24倍冷門，人馬最後只跑獲第13名。

不過，未知周三（28日）是否有數名外籍大師傅如潘頓、郭能、田泰安停賽關係，大摩相隔近兩個月，再度向柏寶招手，騎者晨課已過檔「鷹雄」，看來周三會替這匹應屆一月盃盟主壓陣，出爭跑馬地銀瓶一班1800米。

「鷹雄」本身一戰此程即贏馬捧盃，路有專長，且看柏寶可否趁機做番出齣好戲，加強日後與摩廐合作機會呢？