就算所有人睇完阿仙奴季初表現，加上轉會窗關閉前又冇任何收購，都覺得佢哋前景黯淡，但領隊雲格仍然對兵工廠有信心，仲話球隊可以贏英超冠軍喎。

阿仙奴喺國際賽前嗰周，作客慘負利物浦0:4，畀人批評，甚至恥笑，士氣極度低迷，而轉會窗又買唔到人嚟振奮吓軍心，仲留住一個唔想踢嘅阿歷斯山齊士喺度。所有人繼續睇淡兵工廠，但雲格就繼續口硬，受訪被問到球隊仲有冇機拎聯賽冠軍，佢就回答：「點解唔得？」

教授再就頭先嘅回答進一步解釋：「踢得三場波，有兩場仲要作客，係咪？我哋輸畀利物浦係輸得好樣衰，但係唔代表唔可以翻生，同埋迅速解決問題。確實目前有啲球隊已經處於有利爭標位置，但亦唔係高我哋好多。」佢仲強調就算轉會窗死線日冇增兵，球隊陣容都夠強，只係需要多少少穩定性，唔好只係得一段時間爆發。