尾場開跑前，騎師王為田泰安與潘頓單打獨鬥之局，當時兩人各有兩Win在手。結果潘頓擁躉行運，呢位前季冠軍騎師，夥拍練馬師蘇保羅落飛馬「天笑」後發先至，擊退韋達在港初出座騎，蘇偉賢馬房名氣馬「軍勇戰神」，以及田泰安大熱門翻版步步友「澳斯卡」，爆11倍綠燈獨贏食尾糊埋齋，潘頓憑「發盈喜」、「錶之勝」、「天笑」完成個人全日帽子戲法，兼且力壓安仔勝出這天騎師王。
「天笑」連同今仗服役15戰4冠4亞7季全上名，賽前缺陣6個半月照贏，堪稱全港最忠心鐵馬。「軍勇戰神」22倍在港初出配韋達，令此場賽前已揸住三Win的蘇偉賢，未能四喜臨門，但就衝贏擂台躉田泰安之「澳斯卡」得第二，潘頓同韋達全日首次包辦前二名，即開出121倍大冷Q。
「澳斯卡」頭三仗全勝，上仗斷纜跑第二，今次再褪一步只得第三，多少與早段步速快，對前置馬不利有關。組合獨贏面世以來，出現過兩次A1組合只有一駒做獨腳戲，結果馬會一哩錦標的「步步友」及今場的「澳斯卡」都跑第三，難怪事後有網民話馬會開盤冇死錯人！
尾場跑第四係巫斯義與文家良合作馬「辣得很」，四重彩派三萬二千幾。