中國高速（149）個零星期前復牌披露擬收購武漢農產品交易中心，呢間公司純睇名以為搞高速公路，但實際上係搞物業投資同酒樓，呢次轉型農產品交易中心，方向正確，但成單收購卻疑點多多。
首先集團市值僅6.5億，卻去收購市值兩倍嘅資產，食唔食得落係一大疑點；該交易中心去年純利7400萬，今年保證盈利1.5億元，唔夠數由賣家賠，但保證得1年。另外，若90日內公司未能取得起碼6億元融資，交易會告吹。大嗱嗱6億銀若配股無投資者肯接貨，恐怕只得供股一途。
呢個交易中心建築面積約16.1萬平方米，其實面積唔算大，但作價卻高達11.56億元。同樣於國內搞街市嘅宏安（2925），較早前於廣西投資的農產品交易中心，建築面積21.5萬平方米，投資額只係不足6000萬元人民幣，宏安另投資江蘇常州農產品批發市場，佔地35萬平方米，可銷售及出租面積26.4萬平方米，投資額都只係6240萬元（佔4成）。假如中國高速單「刁」搞得成，宏安國內街市投資可謂執到筍貨。