人體奧妙展！人體奧妙展！」打開電視機，又聽到呢個廣告！其實，人體奧妙亦可以由星座反映，比如天真活潑嘅阿Sa，原來好有機會患上女性病，𠝹女王Edison亦唔差得幾多，好易患上男性病！唔使戥佢哋慘情，皆因12星座分別代表身體唔同部位，每個星座嘅主人，都有個最易中招位，小心！

文：Justin（[email protected]）

天秤座易有男性病

主管腎臟；呢班俊男美女一向講求平衡嘅關係、公正咁處事，於是乎忍得多，個腎就特別易出問題。

星座代表人物：陳冠希

處女座易緊張

主管神經末梢和大小腸；佢哋外表多數好骨感，係因為追求完美嘅程度有時達至神經質地步，引致消化不良、影響吸收嘅後果。

星座代表人物：鄭裕玲

天蠍座易有女性病

主管生殖器官，但要小心因為縱慾所引起嘅問題，其中女性更容易患上女性病。

星座代表人物：蔡卓妍

人馬座易傷臀

主管大腿、臀部；佢哋多數係大PatPat，因為人馬多人一對腳，小心行得多，會整傷大腿及臀部肌肉。

星座代表人物：劉嘉玲

山羊座易爛牙

主管膝頭、骨骼及牙齒；佢哋外表骨感，但原來最易爛牙、風濕、生骨刺、骨質疏鬆。

星座代表人物：黃伊汶

水瓶座易傷小腿

主管小腿、淋巴腺；佢哋多數係美腿型，不但小腿容易勞損，循環系統重最易有事。

星座代表人物：鍾欣桐

雙子座易損手

主管雙手和肺；佢哋不但對眼分得比較開，重因為手多口多，所以不時搞到損手爛肺，易患上呼吸系統病，以及雙手損傷。

星座代表人物：章小蕙

巨蟹座易有胃病

主管胸部及胃部；佢外表好似好和氣咁，其實EQ麻麻，易緊張及鬧情緒，重不時靠食物減壓，所以容易有胃病，個胸好似俾嘢頂住咁。

星座代表人物：梁朝偉

獅子座易心有事

主管心臟及背部；佢哋打扮得又型又索，但內裏就有雄心壯志，背負太多責任，所以患心臟病機會較多，背部亦容易扭傷。

星座代表人物：鄭秀文

金牛座易頸梗膊痛

主管喉嚨、頸肩膀位；佢哋因為牛皮氣、太硬頸，所以易喉嚨痛、頸梗膊痛、聲帶受損、肩周炎。

星座代表人物：何韻詩

雙魚座易便秘

主管腳及排泄系統；外表多數係眼瞇瞇，好多情咁，內裏就因為憂慮而有便秘，而愛着高踭鞋嘅雙魚女更易有腳痛問題。

星座代表人物：徐若瑄

白羊座易頭痛

主管頭部位置；佢哋多數有個大額頭，到處去衝去撞，所以好容易有頭痛、偏頭痛。

星座代表人物：舒淇