雖然話煲呔同港澳辦主任廖暉關係非比尋常，但一講到政改原來就冇情講、冇面畀。民主黨主席李永達爆料話，煲呔同佢哋啲兄弟講，上次見廖暉傾到政改，煲呔簡單報告完畢後，其他意見都未反映，廖暉已經一句「得」埋嚟話：「就這樣！」結果煲呔冇機會講其他嘢就要打道回港。
肥達講笑話，佢同廣東省省委書記張德江傾政改同六四，張書記嘅回應「話不投機半句多」都有七隻字咁多，比煲呔多四隻字。佢重好寸咁話，既然煲呔冇辦法向北京反映普選嘅意見，不如快啲帶民主派上京，等佢哋直接同領導人講，衰咗都服氣啲！
可惜「神女有心、襄王無夢」，唔好講話普選，煲呔同肥龍到𠵱家都冇搵過肥達同卿姐呢啲強硬派傾政改，好似已經放棄民主黨九票，慳番啲口水，游說可能轉軚嘅其他民主派好過，結果搞到一眾人等好鬼㷫，達仔話，卿姐每次飯盒會都狂媽叉煲呔肥龍，爭在就冇爆粗。

范太忠孝兩難全

根據《基本法》規定，政改係要得到三分之二，即係四十位立法會議員支持先可以通過，只要阿爺幫手吹雞，搞掂精神上支持民主嘅寶哥哥、同埋淨係聽中央話嘅金勞詹，政府肯定揸住三十四票，重要撬多民主派六票先得。
有人話，煲呔如果淨係撬到五票，重爭一票先夠票，咁就真係考起屬於愛國陣營嘅范太喇。雖然立法會主席要保持中立，但中立都係要靠主席自律，因為立會好似冇乜規例限制主席參與表決，咁到時范太面對「忠孝兩難全」之形勢，究竟會唔會犧牲自己嘅政治中立，捱義氣賣身下海投佢嘅一票呢？咁到時長毛又會唔會動武護花，就算血洗議事堂，都要捍衞范太嘅形象呢？呢啲場面𠵱家好似好難想像，但係到最後關頭，每票都咁重要。
所以八方都好希望，煲呔同肥龍真係要度個民主啲嘅政改方案，咁樣自然得到民主派支持，范太就唔使咁難做囉！

傳真︰2623-9278
電郵︰[email protected]