剛周三潘頓騎「文藝學家」人見人鬧，不少人認為他慣了時好時懷，而且今期參駒實力甚強，或許會「改邪歸正」。

問題潘頓座騎中，「鞍歌」不只一次漏閘，「赤免寶駒」韁口極敏感屬難騎馬，而「特獎」及「新力威」則抽外檔，最終如跑不出水準，一定較輸掉「文藝學家」更加大條道理，究竟信他今次做忠定做奸？若沒有合理賠率抵銷估錯風險，倒不如諗諗其他馬。

黎海榮座騎中，包括上仗在他胯下贏谷草一哩的「快樂生活」，列陣今期第十場三班1600米，值得一提上仗同場他有嫡系「雷公鑿」也不揀，結果「快樂生活」在極快步速下跟前並無着數，但仍交出一個足夠在二班贏同程的指數贏馬，屬超班表現。

賽後「快樂生活」只加五分着數到暈，難怪賽後黎海榮差不多包辦所有快跳。嚟緊周三「快樂生活」本有三班谷草一哩可報，但仍選擇出王牌跑沙田，看看報名表，原來上文提過的「雷公鑿」出王牌將跑周三那場，如此看來「快樂生活」肯作出「配合」，大可解讀為黎海榮想贏晒兩隻。