英冠周六煞科，修咸頓只要於主場把高雲地利擊退，就算韋斯咸同日主場贏侯城，前者亦能於下季重返英超。修咸頓爭升班，捧[-1]冇甩拖！
修咸頓上仗1:2敗走米杜士堡，現時排第2，只以2分領先第3位的韋斯咸，得失球亦只比對方多3球（修咸頓球差35球；韋斯咸球差32球），倘今仗輸波，而同日迎戰侯城的韋斯咸能全取3分的話，修咸頓直接升班夢便幻滅。假如修咸頓今仗和波，而「槌仔」贏侯城3球或以上，修咸頓亦要踢升班附加賽。他們上仗輸得有點欠運，1分鐘已憑比利沙柏（7仗入7球）先拔頭籌，但最後未能保住戰果完場。
修咸頓上仗輸波後，今仗贏波變得極為迫切，相反已降班的高雲地利今仗沒有爭勝動力；修咸頓主場戰績不俗，全取3分機會甚高。球隊上仗陣容沒有太大變動，預料今仗繼續沿用此陣。中場舒尼達連膝部傷患已經康復，可以隨時候命。高雲地利上仗淨吞篤定降班的唐卡士打雙蛋，下季肯定在甲組競逐。高軍今仗將有上仗領紅的基奧治停賽。利美尼受到腿筋傷患影響，已缺陣兩場，今仗未知能否趕及披甲。
文：湯姆．佐敦

星期六19修咸頓勝[-1]（1.8）