早前熊黛林(Lynn)被爆同舊愛城城分手兩年之後，終於有「第二春」，與身家過億嘅郭可盈細佬郭可頌蜜遊台北，鴛鴦戲水浸情侶溫泉，懶理前度疑似同曾留學生日本嘅女生在微信玩裸聊，繼續愛得癡纏。

據知阿Lynn同男友郭可頌已經發展到同住嘉亨灣階段，勝在可以日見夜見，唔使飽受相思之苦，今年仲可以甜到漏過聖誕。

今日Boxingday，雖然未見佢哋拍拖去街，不過晏晝4點45分，見郭可頌「一支公」揸阿Lynn嘅白色RangeRover出愛巢，不過男友郭可頌就好避忌，喺馬路左兜右兜，避開啲傳媒追訪，最尾仲泊咗喺柴灣工業區停咗陣，較低個車窗同一個女人傾咗幾句之後，就極速開車返嘉亨灣。

記者追到去停車場，郭可頌被問係咪同Lynn同居？佢就話﹕「唔係。」問啱啱係咪想揸架車去維修？佢講﹕「係。」然後急急腳返咗入去，跟手就有保安員驅趕記者。