三日後又是新一年，亦是時候換個新月曆，眼見去年悉心挑選的靚月曆，快將淪為廢物，留則阻碇，丟又可惜；實情可將它廢物利用，改頭換面變成靚靚掛飾，既可Keep番三五張心水的月曆圖案，又所費無幾便可添置一個新裝飾品；呢排買新月曆不妨落重本搵個至靚款，可以留番下年循環再用！

記者：招佩珊　攝影：何家亮

變掛畫！自製月曆畫廊

日本潮人布置家居的伎倆最耍家，這款掛飾的製作靈感便是來自日本潮人部屋書，原有設計是將相片加工，腦筋一轉，索性把月曆圖畫剪裁出來，過膠後將它們串好再掛起，看上去便如掛了一幅幅迷你掛畫；一個月曆只得12幅畫，一於向同事及朋友搜括多幾個月曆，像示範的5×5張月曆，拼砌出30×36吋的大掛飾，就得用上3個月曆。

材料

舊月曆3個、幼鐵線1卷、萬字夾1盒

做法

小貼士

1拆去月曆鐵線圈才取出單張月曆，可避免撕爛。
2最好用橢圖形的萬字夾，容易穿過膠片的打孔位。
3打孔位可套上窩釘，不易變形扯爛，掛飾更襟擺。

變相架！活頁慳位又環保

選擇掛牆式月曆，大抵貪其夠慳位，而這款上揭式大圖畫月曆，其實是變身為活頁相架的的好材料。做法簡單，只需將印上日子的一邊貼上顏色紙及透明膠片，便可套入相片，改裝後月曆變成一個有12頁的相架，隨時可揭上揭落Show不同相片。教小朋友做就最啱，讓他們建立環保知識之餘，亦可保留他們心愛公仔月曆。

材料

顏色紙12張、透明膠片12張

做法

小貼士

若然月曆尺寸大，相片背可貼上Bluetap固定，拼貼出相片集。