抗戰勝利70周年紀念，大前日北京有大型閱兵，不少中港台藝人於微博貼圖致敬，卻同時引爆出三地矛盾。現年62歲的鍾鎮濤當日睇電視直播，有感而發截圖放微博並說：「在電視機前看閱兵，國歌唱一半就哽咽了，熱淚盈眶唱不下去，祖國萬歲！」阿B被網民批評「忽然愛國」，不過阿B的激動情緒竟連跨兩日，前日再於微博貼上兩年前攝於延吉的圖片，背景是中共海陸空三軍，相中的他做了敬禮手勢，他還寫上：「向抗戰國軍老兵致敬！」這次連內地網民都質疑，阿B究竟向國軍、共軍，還是老兵致敬？

阿B懶理網友批評，前晚帶着女兒鍾懿到亞洲博覽館欣賞Maroon 5演唱會，他貼相後留言：「魔力紅樂隊巡迴演唱會香港站！難忘的一個夜晚！」阿B沉醉音樂不談政治，可是他與前妻章小蕙所生的25歲兒子鍾嘉浚卻不甘父親受辱，憤怒的嘉浚昨早在facebook以英文鬧爆揶揄其父的香港網民：「香港人，你哋唔應該叫中國人。好X蠢、好X唔尊重、好X種族歧視，幾乎好似美國警察咁衰。你哋應該表揚千萬位為你捨身嘅士兵。冇咗佢哋，你只係被沖入廁所或用紙巾包住嘅死精蟲。」在美國成長的嘉浚還用美國警察作比喻。

不過嘉浚應該對「國情」認識有限，最後話題越扯越遠，還拉埋六四敏感話題，網友用英文問他：「呢隊所謂嘅軍隊，只係殺死無寸鐵嘅學生。現在，呢個軍隊就企喺佢哋殺學生嘅同一地點，很諷刺吧？」嘉浚即回覆： 「我幾肯定唔係所有士兵都係企喺（殺學生）嗰度。學生事件（六四事件）係好不幸，但你睇吓洛杉磯先，洛杉磯警方出動裝甲車。當年洛杉磯暴動，某啲方面更差。類似嘅事，現今仲喺洛杉磯發生。我會話中國係比美國更文明。」雙方為事件各執己見，爭拗不停。
撰文：楊定