嚟到2019年最後一日，相信好多香港人唔想回顧但同時唔敢遺忘。香港搞到咁，罪魁禍首肯定唔係「暴徒」而係當權者，一班濫用公權力物體如777、鄭若驊、葉劉、何君堯同濫暴警察，如果佢哋消失，可能光復香港呢？

民陣召集人岑子杰就同八方講，如果有日本漫畫嘅「死亡筆記」，一本肯定唔夠寫，因為應該要消失嘅人太多，例如近日就有教育局局長楊潤雄，再加上一班建制派，「隨時兩本先寫得晒」。Jimmy之後好坦白，話自己雖然係「左膠」，但對於警隊暴行，覺得呢世都唔可能原諒，尤其警暴呢半年冇停過仲變本加厲，「特赦雙方係咪得？為社會前進可以行呢步，但人心入面始終唔會放得低」。佢嘅結論係只要制度唔變，呢班人消失晒都冇用，「咪又換過呢一批」，惟有制度改革，自然將呢班禍港分子淘汰。

民主派會議召集人陳淑莊就話，自己有法律界背景，第一個想佢消失嘅係律政司司長鄭若驊，原因好簡單：一字記之曰「廢」。現實係，送中惡法搞到港人遍體鱗傷，鄭若驊就喺倫敦消失咗一排，但之後繼續厚顏唔使問責下台。至於警察，Tanya明白唔可能成隊消失，但起碼濫暴嗰批冇得留低。

反而去到過街老鼠級嘅777，Tanya話消唔消失冇所謂，反正佢早已經半隱形，「不過最想都係冇咗送中惡法，對成個社會同好多手足好大影響」，直言呢樣令佢最心痛。

理大應用社會科學系鍾劍華教授嘅意見就有啲唔同，認為777無論有冇實權，都係呢場風波關鍵人物，如果早就消失最一了百了；社會要警察維持治安，所以違法濫權警察消失就夠。鍾劍華仲睇死政府，就算冇強推惡法，最終都會係會出事，因為歸根究柢都係制度問題。

警拍片鬧造假　自己放流料

米蘭昆德拉喺《笑忘書》話：「人同政權嘅抗爭，就係記憶與遺忘嘅鬥爭。」事實上，香港Popo惡行確係罄竹難書，好似噚日佢哋喺fb專頁出條洗白片，除咗鄧炳強登場受訪自吹自擂，仲不斷指摘社會上有大量假消息抹黑中傷警察，令社會仇警，但呢條全長超過13分鐘嘅片，八方睇咗分幾鐘已經發現，旁白話「6月7號暴徒第一次用汽油彈，呢個汽油彈為（踏浪者）行動揭開序幕」，但事件根本同抗爭運動無關，行兇者係有「東區小霸王」綽號嘅無業漢，八方好在記憶力好，先冇被香港Popo發放嘅假消息呃到！

李八方