【下周日總決賽】《造星II》監製花姐點名讚Oscar 欲拉Mike入ERROR
蘋果日報 2019/12/08 17:27
全民造星姜濤
ViuTV人氣選秀節目《全民造星II》，早前成功選出終極10強進入15日舉行的總決賽，雖然未正式升呢做「星」，但已吸納大批歌迷。今日《造星II》於紅磡舉行拉票活動，撐場的人潮迫爆3層商場，為節目擔任評判的郭偉亮及火火、師兄MIRROR亦有到場支持。
十強參賽者包括14號 Phoebus（吳啟洋）、20號 Oscar（李祉均）、24號 Mike（曾比特）、28號 MC（張天賦）、29號 Tank（梁德忠）、38號 JJ（范卓言）、69號 Brian（阮頌揚）、74號 George（歐鎮灝）、82號 Hugo（丘凱雄）及95號 Justin（陳樂）。各人於台上獻唱拉票，人氣爆燈的MC自彈自唱《Where were you in the morning》俘虜fans的心，Mike以陳奕迅的《演唱會》炒熱氣氛，又做出單身支撐等break dance動作，備受爭議的Oscar唱出經典金曲《芳華絕代》時，更妖艷地坐在台上唱。
節目監製「花姐」黃慧君，被問到心水的三甲人選時，坦言看罷今天的表演，對某些參賽者改觀：「Oscar幾好，佢竟然帶動到全場為佢歡呼；MC都唱得好好，不過我希望佢有突破；Mike唔係偶像派，不過佢好有觀眾緣，跳唱又OK，我直頭考慮想放佢入ERROR；Phoebus幾靚仔。」
提到Oscar及George被網友質疑入圍資格，監製花姐說：「因為我真係入唔到咁多人，其實都係評判揀，我聽到都覺得『吓？』。不過佢哋喺現場睇同睇電視唔同，好似頭先近睇Oscar個眼神好犀利，可能嗰吓啲評判被佢電到。」花姐強調自己只是ViuTV小職員，冇能力左右大局：「都係評判決定，我最多都係同評判介紹每個參賽者嘅性格。」她又否認將於參賽者中選4位加入MIRROR的傳聞：「自己幻想出嚟㗎？我都未諗定。」
呼聲最高的MC感謝大家支持：「我知自己好多人關注，但係又擔心佢哋可以只係留意我嘅負面新聞，不過我對自己都有信心。我而家已經冇睇啲負評，我知自己做緊啱嘅事、行啱嘅路。」早前他父親離世，MC坦言在爸爸最需要的時候未能陪伴：「爸爸離開咗，睇唔到我入決賽，我真係好遺憾，同埋我覺得自己未令佢放心，兌現唔到對佢嘅承諾。」
備受質疑的Oscar及George，對自己亦有信心，Oscar說：「我都想贏，但係更加想做好個演出，令大家覺得Oscar係值得入圍。」George感謝fans的愛錫，直言原本零信心，深知自己負評如潮：「我好易被人哋嘅說話影響心情，而家都唔睇啦。」對於花姐點名讚Oscar，他直言沒想過花姐會讚賞自己：「我會繼續努力，我愛花姐。」
到場支持眾師弟的MIRROR，大讚JJ夠全面、Justin似小朋友般可愛又有音樂才華。問到姜濤的心水？他說：「我唔想揀，唔想畀大家壓力。」至於有傳在參賽者中選人加入MIRROR？隊長Lokman說：「我反而覺得多咗幾把槍向外，多啲戰友。」他謂不擔心有新人加入，舊人會被foul，身旁的花姐即說：「黐線，唔會（foul）啦，佢哋12個係我個仔嚟㗎。」
採訪：盧妹
攝影：陳慧安
攝影：陳慧安
花姐（左）今日點評《造星II》10強的某幾位成員，有讚有建議。（攝影：陳慧安）
《造星II》今天舉行拉票活動，大批fans到場舉牌支持。
MIRROR的fans亦有到場。
火火及郭偉亮今天亦有現身撐場。
Tank（左）即場騷腹肌。
Oscar的資格備受質疑，但花姐指他能帶動現場氣氛。
花姐希望呼聲最高的MC的演出能有所突破。
能唱能跳的Mike被花姐點評，又笑言想拉他加入ERROR。
George深知自己負評如潮，感謝fans的愛錫。
（左起）20號 Oscar、28號 MC、74號 George
姜濤不肯表態，他不希望給參賽者帶來壓力。