粵劇名伶吳君麗周三因肺癌引致肺積水病逝，享年88歲。麗姐的喪禮將於下月3日在香港殯儀館地下大禮堂設靈，4日早上九點出殯。

對於有報道指吳君麗帶病出席薛家燕娶新抱，家燕姐今日接受《蘋果》訪問表示：「我知佢之前係有啲唔舒服，後來冇乜事出咗院。麗姐係一個好怕麻煩人哋嘅人，又唔想我哋擔心，所以咪話冇嘢。

「麗姐睇住我大，亦都係睇住我啲仔女長大，所以當我個仔結婚，當然係好想請佢出席，嗰陣都有問佢健康情況，知道好番冇幾耐，佢都想飲喜酒同見吓朋友，於是約咗修哥（胡楓）接佢，佢哋襯晒衫一齊出席，真係好俾面、好俾面！」

家燕姐還說：「麗姐同我媽咪都好熟，變咗好多時都有來往，嗰陣連續幾套戲都係做佢啲仔女，後期佢有一段時間去咗新加坡，我哋都keep住有聯絡，之後返嚟拍《畢打自己人》，大家有約出嚟飲茶，傾吓拍劇有啲乜嘢要注意，俾吓啲意見。我仲記得送咗摺凳俾佢，等佢拍劇可以用。」家燕姐表示中秋節有send短訊問候對方：「本來諗住過咗中秋冇咁忙，約埋修哥、媚姐（南紅）同卿姐（羅艷卿）一齊傾偈食飯，諗唔到佢突然間會離開，真係好難過、好唔捨得，佢係一個好好嘅前輩。」