久不久會跟爸爸的好朋友飯敍，我每次也想找藉口缺席。爸爸那個好朋友完全沒有問題，而且是位非常和藹的世叔伯，有問題的是我爸爸。「你睇人哋幾叻，大你三年喳，做咗partner啦。」爸爸在上星期的飯敍又這樣說，幾乎是指定對白。爸爸口中的「人哋」是Jimmy，和藹世叔伯的獨子。已經三十幾歲人，還經常被爸爸這樣拿我跟別人的兒子比較，聽起來很灰吧？換個角度看，我在他心目中應該仍然是個小孩子，這樣想的話，挺sweet的。
未夠四十歲成為跨國律師樓的合夥人，未至於驚為天人，但也真的不賴。由我差不多六歲開始，爸爸已常常長Jimmy志氣，滅葉朗程威風。儘管是爸爸幾十年的例牌動作，但每次聽他這樣說，也總有點不是味兒。人生其中一個最重要的決定，也因為這個Jimmy而有所改變。
十幾年前，哈佛大學收咗Jimmy，你大概想像到，Jimmy呢個人生高潮，為我帶嚟咗一個幾大嘅噩夢。「你睇人哋幾叻，哈佛都入到呀！」那個晚上，由飯局到回家的車程，再由回家的車程到我準備上床瞓覺，爸爸也猶如人肉錄音機一樣，不停的用同一種語氣說着同一句對白。本來也視到美國升學為夢想，但自從 Jimmy入咗哈佛後，我決定唔去美國，因為我知自己一定入唔到哈佛，費事畀多個機會老竇滅我威風。

幾十年以來，無論人前人後，挫我銳氣，彷彿是爸爸的favorite pastime。就在幾天前，在家裏跟他們吃晚飯，談起交稅，葉朗程帶着無比驕傲跟爸媽宣佈今年要繳納的稅款。「如果你當年畀多啲時間讀書，今年可能交得仲多呀。」爸爸說，然後是兩聲大笑。畀着我係佢都笑，咁都畀佢入到位，欽敬。「對得住自己就得啦，而家都好好呀。」媽媽說，撐我，世上她最好。「如果當年佢識計劃得好啲，而家肯定仲好。」爸爸鍥而不捨，似乎誓要把我打沉。
媽媽夾嚿排骨畀爸爸，然後淡淡然說：「如果當年我計劃得好啲，都未必嫁你。」爸爸忽然面紅，低頭扒飯。媽媽當年在香港大學雖然不是讀醫，但靚到連醫學院有幾個醫生仔都爭住追佢。相反，我爸淨係中七都讀咗兩年，唔好話Harvard University，連Fukin University都唔收佢。談到這裏，我想說個故事。
讀中學時候，對辯論很感興趣，每逢辯論隊的師兄有比賽，如果時間許可，必定走去觀戰。其中一次是我校跟一家國際學校的英文辯論友誼賽，辯題是classic到不能再classic的「中學生不應該談戀愛」，我方是反方，即是支持戀愛。正方的論點正路得很，說戀愛影響學業，甚至說戀愛有機會讓雙方發生關係，到時珠胎暗結，必定前途盡毀。估佢唔到嘅係，前途盡毀都未係結局，仲要講埋前途盡毀之後，冇晒希望，又太大壓力，最後可能搞到自殺。一句講晒，中學拍拖就是死路一條。

辯論比賽途中示愛　夠精采

正方那位女生講到自殺嗰句，蕩氣迴腸，七情上面，仲有少少淚光，氣勢好勁，完全壓得住台，但我們一眾師弟完全沒有替下一位發言的師兄擔心。即將發言的師兄，出名成績好，轉數快，雖稱不上玉樹臨風，但身高五呎十一吋，皮膚白白，鼻樑架着一副老實眼鏡，甚有書卷味，但其實是白面書生假正經。佢一行出嚟，企喺中間，嘴角微微翹起，少少輕佻，好多自信。
師兄望一望評判，再笑瞇瞇望住頭先七情上面嘅正方女同學，輕輕吸一口氣，開始說：「我一向好羨慕你哋呢啲讀國際學校嘅學生，因為人人都話國際學校作風開明，鼓勵學生創意。聽完頭先嗰位女同學發言之後，我就更加肯定係名不虛傳，由拍拖講到死亡，可以如此合情合理，親愛的對手（my dear opponent），你直情可以做編劇。可惜我哋今日唔係拍戲，係要辯論。」
正方那位女學生冷笑，師兄繼續。「我唔敢話你頭先講嘅情景冇可能發生，但如果吓吓都攞極端例子嚟講，我覺得冇意思。即係如果有人問你，需唔需要讀大學先有前途？然後你話唔需要，因為李嘉誠都冇讀大學，你覺得有冇point？完全冇point，因為李嘉誠係極端例子，反映唔到現實。同樣地，中學生談戀愛就會自殺呢個可能性，都係反映唔到現實嘅極端例子。」

師兄講到呢度，我覺得佢已經贏咗，型到喊。「係好X型，但係好似未中point喎。」坐在旁邊的Benson細聲說。那應該只是師兄的開場白，是時候入正題吧？萬萬想不到，他的正題比開場白更爆。
師兄又望着剛才發言的正方女同學，說：「雖然我覺得你頭先講嘅嘢冇point，但係我，其實，已經有少少鍾意咗你。」WTF？「識咗你唔夠15分鐘，但係你真係好靚。由入場開始，你應該已經留意到我係咁望住你，阿媽教過我，staring is impolite，if you feel offended，對唔住。」
女生的臉頓時變紅，是scarlet那種紅。其餘的辯員，無論是正方還是反方，無不瞪大眼睛看着他。評判背着觀眾，所以我看不到他們表情，但大概也是O爆嘴。「我哋呢場辯論比賽，你哋其實已經贏咗。雖然我係學校嘅主力辯員，但係我已經唔care呢場比賽。喺呢一刻，我嘅number one priority，係你。」
其中一位評判正想出言介入，師兄沒有給他機會，以更洪亮的聲線繼續：「中學生嘅戀愛，就係一回咁樣嘅事。真摰，冇雜質，義無反顧，話鍾意就真係鍾意，唔使睇你做乜嘢工作，唔使睇你屋企有幾多錢。人哋話，上到大學拍拖，女仔會考慮個男仔有冇前途；出嚟做嘢，女仔會考慮個男仔有冇錢。看似係戀愛嘅戀愛，原來只不過係兩個人揸住部計數機㩒嚟㩒去嘅遊戲。如果中學生都唔把握住呢個談戀愛嘅機會，可能一世都唔會談到真正嘅戀愛。」

荒唐與任性　或是幸福泉源

評判不斷搖頭，師兄沒有理會，結案陳詞：「我見到評判皺晒眉，係我意料之內。喺呢一刻，我唔需要佢哋認同，你認同我，已經好夠。May I at least know your name？」女方清一清嗓子說：「Shirley，and may I know yours？」
有些人跟Jimmy一樣，每條數計得清楚，每個目標定得清晰，一步一步，沒有半點偏差，就這樣成功了。有些人卻像我的辯論師兄，一生可能做過很多荒唐的事，但長大之後，往往就是這些荒唐的事，以及跟你一起荒唐過的朋友，才最值得你回味。
有時候，一刻的荒唐，一點的偏差，一絲的任性，可能就是幸福的起源。話說回來，我媽放棄了做醫生太太的機會，跟了一個連Fukin University都進不到的死