雷神回歸做蔡廐主帥，六個賽日已為馬房贏七場，質新馬操起之外，雷神發揮亦功不可沒，蔡約翰欠一W便超越告東尼的領先地位，今年最後一戰，其中第一場四班1650米泥地，「架勢」落四班對手轉弱，有力食出頭糊，睇好蔡廐可以榜首身份踏入2019年。

第二場五班1200米草地：「銀城福星」今季轉丁廐一鳴驚人，同程力壓「海明珠」為馬房省靚招牌，賽後檢討是大摩操練手法有問題？還是丁冠豪識令前駒變身？

「銀城福星」減至為新低的24分，再加上當日黃俊減十磅最有關，負107磅而面對一群水兵，只要有少少競爭力，都足以解讀成贏馬原因。

「銀城福星」之後四仗換人兼轉不同路程，最差只輸不過四個半馬位，狀態無容置疑，最重要是馬房肯繼續落心機操練。

「銀城福星」上仗拼後跳三課，兩課在泥地單跳嘭嘭聲，最後試跑落草地，叫助手刻意拖實，拉士造28秒1，儲火儲體力。目前馬房爆倉，肯定是丁仔認為有分在手才會留低，識贏之馬仍受讓上陣，當打騎師巴度零死磅，威力非同小可。