花旗國經濟近排轉勢，連帶當地銀行都齊齊翻身！以資產值計，全美國最大嘅銀行─美國銀行（BankofAmerica），仲勁到擊敗大笨象滙豐控股（005），成為今年全球個名最值錢嘅銀行，值成306億美金（大約2387億港紙）！
騎住大笨象嘅又點只美銀呢？富國銀行就以289億美金嘅品牌價值排第二，將舊年一哥滙控逼落第三。所謂有人快活有人愁，舊年捲入涉嫌欺詐客戶事件、搞到俾美國證監會起訴嘅高盛，就跌出十大，由第7位跌到落第16位。
打入頭一百名嘅花旗國銀行亦增加到90間，比舊年多5間。負責製作排行榜嘅BrandFinance行政總裁DavidHaigh就話，花旗國今年嘅經濟應該會加快增長，當地銀行嘅壞賬會少咗，而錢就賺多咗！
至於內銀嘅表現都大躍進，好似工行（1398）同建行（939）咁，都成功打入十大，位列第8位同第10位。而中銀（3988）、農行（1288）同交行（3328）都升到上第17、23同36位，睇嚟中國今年應該繼續有運行喎！