【隔牆對論】
特首梁振英競選時拋出毋須焚化爐的口號，賺盡掌聲，當選一年後面對擴建三個堆填區的現實，去年擴建大計在立法會一片反對聲中滑鐵盧，今年政府在原計劃下增添造價182億元的焚化爐。面對本港每日逾9,000噸生活垃圾壓力，立法會環境事務委員會主席何秀蘭坦言一邊驚政府減廢走數，但亦承認三堆一爐「焗住要做」，在泛民陣營罕有傾向支持。環團堅持六個環保辣招，逼政府對減廢政策加碼。
記者：潘柏林　雷子樂

記：《蘋果》記者
何：何漢威 綠領行動總幹事

記：
政府不斷強調有需要通過「三堆一爐」，環團為何有保留，堅持提出六個辣招？
何：
我哋睇到末端處理設施需要，我哋從來冇否定呢樣嘢，但係始終見到末端處理設施係好多大規模，三堆一爐個爐（每日處理）3,000公噸，新界西北（堆填區）講緊面積200公頃，再加上過去咁多屆政府record真係比較差，好多減廢工作一路冇做到，我哋雖然知道有個需要，但佢做減廢工作未如理想，如果今次係毫無條件毫無要求畀政府通過，日後政府會唔會走數？對減廢工作不再着力？
記：
減廢政策需要長時間見成效，但堆填區飽和問題迫在眉睫，你如何回應？
何：
我哋冇話要求佢一年之內做晒所有嘢，甚至冇要求佢喺今屆政府做晒所有嘢，我哋要嘅係清晰時間表，哪怕係去到2018年話到計劃係點，譬如生產者責任制，我哋睇唔到未來有冇時間表，幾時做、做邊樣；譬如堆填區禁令，係好多地方都禁咗，台灣、韓國、西歐嗰邊都有禁令，有咗禁令就唔可以棄置廚餘喺堆填區，回收業自然蓬勃起嚟，但係我哋辣招要求佢實施堆填區禁令，但佢冇話未來會做，我哋唔係要佢𠵱家做，起碼有個承諾今年要諗，幾時會落實。

梁振英上台前推銷的環保政綱強調源頭減廢，聲稱當選後會着力推動減廢減廚餘措施，然而上任至今，一般市民卻認為這屆政府很多承諾不兌現，梁振英競選時的政綱「走數」，在環保減廢方面，也憂慮他會以無講等於不存在處理。
記：
但政府想法和方向與環團是否一致？
何：
我理解局方對減廢有決心，只不過可能方向一致，但速度唔一致。作為民間團體、監察政府組織，要求一定會高啲，但我哋好現實，幾個環團唔係一夜之間決定六個辣招，經過唔同會議磋商，我哋都係覺得呢啲唔係mission impossible嘢，呢啲係困難嘅嘢，有難度嘅嘢，但唔係上月球攞月亮落嚟，有困難唔代表要放棄唔做。
記：
但政府認為已推出很多政策藍圖，你覺得環團的要求是否太多？
何：
今屆落實政策對佢哋已經講開到好行，我在佢位置都覺得開到好行，但我諗唔代表現實開到好行。佢由0變到2覺得係兩倍，但我哋睇番整個環境要去到100，（就算）我唔要100，要50都好呀，但2同50可能仲相差一個距離，六個辣招我哋希望攞到幾多得幾多。

多年來民間團體提出很多環保、減廢建議措施，惟獲政府接納，可落實的十分有限，很多時更石沉大海，官員拒絕接納民間智慧，難讓全民參與推動政策及措施，有人認為是令香港廢物問題越來越嚴重的主因，若政府不改變思維，局面難以扭轉。
記：
環境局局長黃錦星指辣招涉及政策複雜，環團有否考慮實際操作難度？
何：
其實係好多部門唔合作，政治任命官員與AO（政務官）係咪可以互相配合？局與局之間都要配合，佢要攞錢又唔畀，佢要攞地又唔畀地。一定要阿頭講夾掂佢，做得到為止，好似人工島要地嘅，土木工程署所有霹靂啪啦開晒綠燈、EIA（環評）環保署全部同你搞掂佢為止，我仍然覺得（辣招）唔係mission impossible。用番林鄭嗰句，我哋都有商有量，例如2018年工商業廚餘做堆填區禁令，如果計到條數話搞唔掂，延遲一年囉，但你要話畀我聽會做。堆填區禁令係好重要，之前有商家搵過我哋話想搞廚餘回收，係好大嘅跨國企業，啲鬼佬同兩個環團見面，佢哋係好有興趣蠢蠢欲動，我哋見到商機已經喺度。
記：
三堆一爐仍審批中，政府已指或需要更多焚化爐，焚化爐大門一開，對未來有何影響？
何：
當有咗焚化爐，好多減廢工作變咗冇逼切性、立法去規管廢物，無論係垃圾徵費以至生產者責任制一定有人反對，正正呢啲係世界各地都係有效工作同必須政策。如果有咗焚化爐，甚至開咗第一個已經有人講緊三堆二爐，到時有咗焚化爐，大家都覺得有需要燒，唔夠嘢燒都有問題啦，變相減低減廢工作力度，政府以至社會都冇咗逼切性。

mailto:[email protected]