噚日2600萬金多寶一注獨得，華華雖然唔係幸運兒，但就幫各大發展商諗到條推樓盤絕世好橋。你話新盤附近有個發達投注站，呢個噱頭sell唔sell得呢！
好似北角新盤港濤軒咁，02年同04年兩次端午金多寶頭獎得主，都喺港濤軒對面嘅馬寶道76號國賓投注站投注。你話如果買家知道個盤，有個咁就腳嘅發達投注站，都咪話唔吸引。

港濤軒近金多寶勝地

港濤軒由太古（019）同中華汽車（026）合作發展，今個月頭開售，賣咗100個單位，平均呎價9000蚊，發展商見近排樓市好景，已經封盤。
睇番馬會公佈嘅十大幸運投注站，由94年至今年9月尾，中最多六合彩頭獎嘅，係中環士丹利街10號嘅投注站，喺呢14年間，共派過31次頭獎，距離呢個投注站遠少少，有位於荷李活道嘅聚賢居，家陣仲有貨尾賣緊。
其他幸運投注站附近嘅新盤，就有尖沙嘴漢口道39號怡達中心投注站，14年派咗25次頭獎，附近最快會開盤嘅係由新世界發展（017）同市建局合作嘅河內道項目。屯門市廣場第三期地段277號地下嘅投注站，亦都喺呢14年中過25次頭獎，最近呢個投注站嘅新盤有恒地（012）發展嘅豫豐花園。
二手樓選擇更多，荃灣荃錦中心樓下就有個發達投注站，14年中咗27次頭獎，頭獎命中率僅次排頭位嘅中環士丹利街投注站。講到今年最旺嘅投注站，係上水石湖墟新豐路134地下，今年已經派咗4次頭獎，附近較大型嘅二手盤有新都廣場，樓價今年升咗6%。

十大幸運投注站附近屋苑樓價

投注站地點：中環士丹利街10號　屋苑：嘉兆臺
現平均呎價（元）：9360　全年升幅：18%

投注站地點：荃灣荃錦中心　屋苑：荃錦中心
現平均呎價（元）：3400　全年升幅：8%

投注站地點：觀塘廣場　屋苑：麗港城
現平均呎價（元）：3672　全年升幅：9%

投注站地點：尖沙嘴漢口道39號　屋苑：港景峯
現平均呎價（元）：8150　全年升幅：21%

投注站地點：九龍灣德福大樓　屋苑：德福花園
現平均呎價（元）：3914　全年升幅：18%

投注站地點：沙田好運中心商場　屋苑：好運中心
現平均呎價（元）：3250　全年升幅：4%

投注站地點：屯門市廣場第三期　屋苑：屯門市廣場
現平均呎價（元）：2095　全年升幅：10%

投注站地點：上水石湖墟新豐路　屋苑：新都廣場
現平均呎價（元）：3620　全年升幅：6%

投注站地點：大埔廣場　屋苑：大埔廣場
現平均呎價（元）：2608　全年升幅：8%

投注站地點：上環干諾道西3號　屋苑：康威花園
現平均呎價（元）：4503　全年升幅：5%

資料來源：香港賽馬會及美聯物業

mailto:[email protected]