喺澳洲，唔少人嘅頭號願望係可以擁有自己嘅「夢想家居」，但面對樓價近年大升，一般打工仔要做業主可能真係要發夢先得。有地產界人士教路，如果有意置業者肯住離市區遠啲，隨時有機會執到平貨。
根據澳洲房地產業協會（HIA）聯同澳洲聯邦銀行合作進行嘅調查，當地未曾置業人士平均要用40.38萬澳洲紙（下同．約262萬港銀）先可以一圓業主夢，每月供樓開支佔收入約三成，供樓能力係23年來最弱。
以墨爾本為例，首置人士負擔嘅樓價中位數由05年3月嘅33.93萬，升到今年3月嘅37萬（見表），比全國中位數38萬稍低。
GAry喺《周日先驅報》討論區發牢騷，話佢同老婆每年搵得嗰3.5萬，唔去睇戲兼夜晚唔去玩，儲咗9年錢，銀行都唔肯借錢畀佢哋買樓。

近郊隨時執平貨

住喺墨爾本嘅Anthony批評澳洲總理霍華德領導嘅政府無能，未能有效控制樓價，只顧控制土地供應，到頭來搞到樓價係咁升。
不過，《澳洲物業投資者》雜誌嘅利特廸教路話，喺澳洲唔少大城市，首置人士假如肯遷就一下，搬到離市區29公里遠，就有機會執到寶，用30萬就可以買到一間獨立屋，呢筆錢喺市區僅夠買個細單位；佢話以咁嘅價錢梗係買唔到夢想大屋，但至少踏出第一步，而且離市區20公里都唔算偏僻啦。