事隔一個月重提選戰，林子琼仍心有餘悸，「好難，呢一區真係好難」。對24歲的她而言，這的確是一場硬仗，她在上水彩園選區把爭取六度連任、擔任區議員25年的民建聯老將蘇西智拉落馬，成為回歸後區內首個民主派區議員。由民主黨社區主任化身候任區議員，籌備出選兩年，紮實的地區工作經驗，成為她抵抗對手屢次打壓的最強後盾。上任後，她承諾增加區議會透明度，亦首要改善區內水貨、衞生等問題，以行動實踐師父林卓廷教導：「做人要真心，唔可以呃街坊。」

記者 盧珮瑤

有別於其他年輕議員笑得開懷的勝選相片，林子琼的照片是她在票站內哭得面紅耳赤，「我無諗過贏千票咁多！」是次區選，北區彩園選區有3位候選人，除了來自民主黨的林子琼，還有已連任五屆的民建聯蘇西智以及前新思維成員黃成智。最終林勇奪4,295票，以近千票拋離3,305票的蘇西智，而黃則獲177票。

地區工作紮實 親自帶隊幫街坊滅蝨

林仍於城大修讀亞洲國際，兩年前的一次實習令她前途逆轉。由於她家住上水，被派到民主黨立法會議員林卓廷的石湖墟辦事處工作，曾服務彩園及祥華區，漸漸愛上地區服務，「做地區服務人工係好低，但係唔係千篇一律嘅工作」，後來更加入民主黨擔任社區主任。與街坊的情誼從此萌芽，遂冒出「打區」的念頭，早於2017年便向林卓廷提出希望出選區議會，最終落戶彩園，「所以我唔係因為反送中先（參）選嗰批人。」

早前林曾在fb張貼與領展負責人的WhatsApp對話紀錄，當她以社區主任身份追問領展有關舖位問題，領展長期「已讀不回」；惟化身候任區議員後，領展竟馬上變臉主動跟她打招呼。「佢個商場嘅設定都唔符合居民需求，由兩個超市變返得一個。」她坦言，蘇西智在任的25年間，區內累積了不少問題，如領展霸權、水貨、區內衛生、照明系統不足、鼠患等，「佢都無乜點解決過。」林指，彩園較嚴重的問題非木蝨莫屬，「最多係一啲獨居老人，或者一個聾一個盲，連自己屋企有木蝨都唔知，但已經好嚴重。」惟滅蝨服務每次動輒要數千元，她決定自組義工團隊到街坊家中打掃。訪問期間，她更在辦事處掏出一個花費數千元的滅蝨機，「睇吓有幾嚴重，每次每戶都要搞兩三個鐘。」

選戰期間屢遭民建聯打壓

在成為區議員的路上，林子琼迎來不少來自對手的「路障」，屢遭民建聯蘇西智打壓，尤在處理木蝨問題時為甚，「我哋請咗滅蝨公司嘅人嚟講講座，就向房屋署book場，佢哋知咗就話畀房署知，我一定要喺佢（林子琼）前一日book到場，再請返同一班人嚟講講座。」當對方看見她於公園設街站為長者量血壓時，又會着保安來趕他們走。打壓不斷，她形容是「好困擾」。

雖然着力以地區服務扎根於彩園區，林指當初對勝算只是「五五波」，「佢（蘇西智）做到廿幾年唔係無道理，因為嗰種強大嘅資源，太犀利喇」。選舉當天，她更碰見平日服務的街坊都打算投票予蘇西智，「佢哋同我講『對唔住，我都係要投票畀蘇生，咁多年我都係投畀佢』，嗰刻覺得好絕望」。憶述點票心情，仍是一票一驚心，「我個點票代理人一直喺我隔籬，佢話我哋有3,906票就夠贏㗎喇，我話邊會有咁多，無可能咁多！」直至開票箱一刻，她看到自己的票漸漸堆積如山，才放下心頭大石。

最終，林雖以近千票拋離對手，事實上蘇西智的票數在反送中的浪潮下，票數仍然比去屆更多。翻查資料，蘇西智於2015年區議會選舉中獲得2,481票，今屆比去屆更多出824票，「我覺得佢以前都無推晒鐵票出嚟，係夠贏就得」。她認為是次大比數勝出，絕對與年青人在反送中後踴躍投票有關，「我係樂見年輕人開始關心返佢哋嘅社區。」

師父林卓廷如「唐三藏」：佢教我做人

成功上任，除了依靠個人努力，她亦不忘有一個人為自己牽引道路。跟隨林卓廷工作多年，提起這位師父，她隨即笑開懷形容他有如「唐三藏」，「我最深刻唔係佢教我點做case（個案），係點樣做人。」

被問到林卓廷所傳授最難忘的道理，「教我要真心，唔可以呃街坊……當你真係處理唔到街坊求助，你同佢講『對唔住，我真係處理唔到』，其實佢哋唔會怪你、鬧你，但係唔可以不了了之。」既然港府做不到勇於面對市民，則由議員做起。林指，林卓廷亦以自身作榜樣傳授當議員應有的品行，「佢嘅口碑都係咁樣得返嚟，而家佢落到區，街坊見到佢都會好開心。」

即將上任，林子琼送給自己的座右銘是「革新彩園」，「係一句口號，都係最想做嘅事。」未來先決的任務是處理水貨問題，「特別係我嗰區，街坊返屋企都要經過水貨區」，又呼籲上水街坊「唔好只係靠晒一兩個區議員」，必須團結才能解決問題，「好似之前光復上水咁，你哋一齊齋望住佢（水貨客），佢哋都已經驚。」另外，林亦希望增加區議會透明度，包括爭取區議會直播，又會在每次開會前把相關文件張貼到彩園社區會堂外，「可能book一日畀街坊講吓意見，可能就咁貼個『支持』、『反對』嘅磁石都得，希望做到全民議政嘅感覺。」

-----------------------------

民陣元旦大遊行

日期：2020年1月1日
時間：下午2時集合
路線：維園中央草坪至遮打道行人專區
主題：毋忘承諾 並肩同行
*不反對通知書申請中
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此