今日係聖誕節，謹祝大家聖誕快樂，再過一個發財新年。
現在係放假季節，特別多人去上海趁熱鬧，上海已成為亞洲最有吸引力之城市，人人都要去過、讚嘆過，先至追得上潮流。呢幾日唔少香港人就會擠擁在上海新天地，好似顧問K咁，就同成班中坑去上海度假，準備與上海各類著名餐廳搏命。

長駐上海嘅賓架S就反其道而行，返落嚟香港會妻。既然咁耐冇同佢見面，幾位老友特別約佢出嚟食飯。賓架S話上海冇錯係好繁榮，但不排除有泡沫成份，譬如人人講上海建設好，其實人人都睇得到浦東好多高樓大廈都係十室九空，一啲建設並唔係想像中咁美麗。
賓架S以前曾住在「金茂」，因為號稱亞洲最高酒店，人人都要試吓，生意非常好，但賓架S啲老友認為金茂有三大缺點，住一次就夠，唔想repeat。第一點，金茂啲房間，愈高層愈細小（因為建築物外型係下闊上窄）；第二點，朝早上班時間，人人去食早餐、赴約會，搭𨋢轉𨋢好麻煩；第三點最緊要，就係因為酒店太高，流動電話駁唔到線，經常失靈，完全失去「漫遊」嘅作用。
第一、二點，左丁山略有所聞，第三點就冇諗過，係要賓架S住得耐先至知道手機唔通嘅真正原因。不過手機唔通，都唔係乜嘢大缺點啫，只是香港人住酒店，點可以忍受手機斷線吖。