韓國男星丁海寅早前因為孖女神孫藝珍合作韓劇《經常請吃飯的漂亮姐姐》（漂亮姐姐）而人氣急升，成功上位，早前佢更首度襲港舉行粉絲見面會，冧暈一眾港迷，而丁海寅是次來港亦抽空接受本報訪問，再次感謝拍檔孫藝珍嘅照顧，又自爆係梁朝偉嘅超級粉絲，最愛看偶像嘅電影。

問到先後跟秀智及孫藝珍合作有咩感覺時，丁海寅：「首先，跟咁靚嘅秀智合作，已經覺得好幸福。而拍攝《當你沉睡時》嘅同劇演員因為都差唔多年紀，大家好似朋友一樣，拍攝時感到好舒服及開心。」提到跟孫藝珍合作《漂亮姐姐》，丁海寅表示：「第一次擔正做男主角，可以跟孫藝珍前輩合作，感到好光榮，而且拍攝時跟前輩學到好多。」又透露拍攝期間，孫藝珍好照顧佢，而且於孫藝珍身上，學到做男主角應有嘅態度。

丁海寅認為自己跟《漂亮姐姐》中俊熙一角都好相似，不過俊熙係留學生，曾於外國生活過，相比之下比佢本人更為積極。丁海寅亦提到跟劇組去札幌慶功一事，表示最難忘係去主題樂園玩機動遊戲，雖然佢係覺得有啲驚，但都好鍾意玩，因為本身好鍾意刺激嘅事情。

丁海寅曾於記者會上表示希望跟梁朝偉合作，丁海寅再次強調：「我係梁朝偉嘅超級粉絲，睇過好多香港電影，套套都好鍾意，當中《無間道》及《花樣年華》對我影響好深。」

另外，丁海寅亦分享keep fit心得，表示一定要注意飲食，再配合運動，而佢一向好鍾意做運動，就算嚟到酒店，見到有瑜伽墊，佢就立即用嚟做掌上壓練肌肉。而丁海寅於見面會上大展歌喉，佢表示：「我鍾意唱歌，但唔係唱得好聽。想喺公司內好好學習，再唱好啲畀大家聽。」而佢就鍾意彈結他嘅歌手，例如同公司嘅樂隊CNBLUE嘅鄭容和。

更多韓流，喺晒《娛果》
http://fb.com/appledailyent