意大利近年新星輩出，教練雲杜拿日前公佈25人名單，出戰24日主場對阿爾巴尼亞嘅世盃外，以及28號作客荷蘭嘅友賽，任性程度就更加嚇親人！除咗阿特蘭大23歲中場史賓亞蘇拿、國際米蘭28歲守將迪岩布斯奧、22歲中場加利亞甸尼、薩斯索羅23歲前鋒保列坦奴同博洛尼亞24歲射手施蒙尼華迪齊齊等攞國家隊首頂「喼帽」，連烏甸尼斯外借意乙球會SPAL嘅19歲門將美列特（Alex Meret）都入選，同「新保方」基安盧基當拿隆馬以及「正牌」保方爭一席！到底美列特同SPAL係咩來頭？

原來呢支目前意乙榜首球隊喺2012年經歷第二度破產後由意丁重新出發，短短3季間連升兩級，今季更喺前列斯聯射手安迪奴斯同前拉素射手費路卡利領軍下，暫時喺榜首兩分力壓費辛隆尼，殺着之一係出色防守，31戰失29球屬聯賽第4少，難怪美列特一躍而上有望成為大國腳！