一連9場《李克勤慶祝成立30週年演唱會》今晚紅館開鑼，克勤以《舊歡如夢》打頭陣，不過今次佢冇跳到招牌舞步，反而喺12位舞蹈員陪同下演出，之後克勤再唱出《In The City》，及以《紅日》及《夏日之神話》等經典hit歌組成medley快歌。

喺唱完一連串medley後，克勤跳到身水身汗，話自己好似跌咗落泳池咁，不過當佢問啲觀眾自己跳成點時，現場一度出現dead air，克勤醒目即話：「我知大家係為咗聽歌入嚟嘅，頭先嗰啲係甜品，不過我覺得唔同年齡、唔同階段嘅歌手都有唔同嘅進步空間。」

克勤又話，雖然今次係30周年演唱會，聽起上嚟好似好巴閉咁，但係佢話自己日前做過入行50周年嘅汪明荃演唱會嘉賓，先覺得入行30年其實都唔係多，佢仲打個譬喻：「好似Celine（入圍《全美一叮》小巨肺）咁，如果佢早入行的話，30周年都只係30幾歲，所以大家唔好睇得咁煞有介事，只要大家睇得開心、enjoy，一齊玩就好。」

克勤再提到，話自己喺紅館開咗過百場演唱會，「可能有啲歌手遇到打風，但我好好彩，因為如果打風就要開日場，我哋呢啲死老嘢，可能都冇呢啲體力去做，咁可能有啲歌手做做吓就會病，但今次搭台都搭唔切，個台比預計搭遲咗一日至搭起，係今日晏晝2點鐘先搭起，所以可能大家會見到啲沙石，有啲唔完善，希望大家多多包涵。」