西甲勁旅皇馬上周六喺美國巡迴賽首次贏波，以2:0擊敗皇家鹽湖城，兩位前曼聯球星成為主角。前鋒雲尼斯達萊（雲佬）為皇馬射入首個入波，而被英格蘭國家隊拒諸門外嘅碧咸亦收拾心情於下半場上陣，但表現就失色得多。
皇馬呢場波排出「4-3-3」陣式，由「雲佬」、卡斯辛奴、魯爾為3箭頭，結果卡斯辛奴臨完上半場博到12碼，由「雲佬」射入。呢位荷蘭前鋒再喺64分鐘妙傳隊友羅賓奴入波，一射一傳為球隊打開呢次美國行嘅勝利之門。

其實，我求大俠見到「雲佬」翻晒嚟，不禁替唔夠前鋒用嘅曼聯領隊費格遜難過，點解個個前鋒離開自己後都生猛晒呢？好似維拉利爾前鋒科蘭又係一個好例子，睇嚟老眼昏花嘅費格遜唔認老都唔得喇！
呢場波另一個主角係「萬人迷」碧咸，呢位啱啱俾新任英格蘭國家隊領隊麥卡倫棄用嘅球員，下半場後備上陣後即刻成為攝影機嘅捕捉對象，但係佢好明顯心情麻麻，連招牌笑容都收埋咗。
結果佢喺64分鐘居然喺禁區前犯規差啲輸12碼，而86分鐘有個射罰球機會，點知佢一射沖天而去，連招牌撒手鐧都走埋樣，點入選國家隊呢？
「人生不如意事十常八九，最緊要爭氣唔好洩氣，唔係就真係冇得救，碧咸好應該向雲佬學習吓；塞翁失馬，係福係禍第日至知。」