日本女子樂隊Silent Siren昨晚假九龍灣國際展貿中心Music Zone開騷，呢次香港演唱會SILENT SIREN Live Tour 2017「新世界」一連兩晚舉行，係四人世界巡迴演唱會嘅第一站。

Silent Siren由吉田菫、梅村妃奈子、山內Aina及黑坂優香子組成，四人已連續第三年來港舉行演唱會，噚晚以今年單曲《Fujiyama Disco》打頭陣炒熱氣氛，之後主音吉田菫以廣東話：「大家好，我哋係Silent Siren！你哋開心嗎？」跟現場粉絲打招呼。唱畢頭三首歌曲之後，四位成員都分別用廣東話介紹自己，吉田菫又話：「香港好熱，我好鍾意香港！」低音結他手山內Aina亦表示：「打邊爐好味！」鍵盤手黑坂優香子就大讚西瓜汁超好味，鼓手梅村妃奈子被爆與主音膽粗粗去了非常地道嘅茶餐廳食午飯，由於佢哋唔識睇餐牌，結果只能夠按照相片亂點，結果點了扣肉飯。

港騷上，Silent Siren將歌曲《追夢》加入廣東話歌詞，將日文歌詞改為「完全沒法stop、完全沒法stop woo」雖然現場歌迷似乎未能聽出廣東話歌詞，但都非常欣賞四人誠意！四人又扮港女，用廣東話搞氣氛說：「真係o架？」、「點解嘅？」，十分搞笑。